Toqugutta assigiimmik pineqassaagut
Siumumeersoq Ruth Heilmann toqusoqartillugu malittarisassanik erseqqinnerusunik kissaateqarpoq
Toqusoqartillugu malittarisassat erseqqinnerusut aalajangersimasullu atuunnissaannik Siumumit Inatsisartunut ilaasortaq Ruth Heilmann kissaateqarpoq, ualeq mannalu Inatsisartut ataatsimiineranni siunnersuutigalugu toqusoqartillugu pisortanit ikiorsiissutaasartut pillugit nassuiaammik naalakkersuisut kingusinnerpaamik 2013-imi upernaakkut ataatsimiinnermi saqqummiussissasut.
– Qanigisaanut ilisiartornermi angalanernut kommuninit ataasiakkaanit tapiissutaasartut annertussutsimikkut assigiinngissuteqarpat, Ruth Heilmann aperaaq.
– Assersuutigalugu ilaqutareeqarpoq arfinilinnik meeralinnik, taakkualu ilaat marluk Kalaallit Nunaanni kommuni najugaqarput, marluk kommunimi allami najugaqarlutik, marlullu Danmarkimi najugaqarlutik. Taakkua arnaat toqukkut qimaguppat qitornat taakku arfinillit arnamik ilisaaneranut najuukkiartornissaminnut ikiorsiivigineqarsinnaanerat assigiinngissuteqassaaq.
– Taamaattoqarnissaa kissaatigaarput? Uanga tamanna kissaatiginngilara, meeqqammi assigiinnik pisinnaatitaaffeqartariaqarput, Ruth Heilmann oqarpoq.
Ataqqinartumik naggasiineq
Ruth Heilmann naapertorlugu Naalakkersuisut nassuiaataat inassuteqaatinik arlalinnik naggaserneqassaaq, pisortani oqartussat toqusumut taassumalu sugisaanut ataqqinartumik toqusup ilisaaneranut toqusullu toqquigisaanit Kalaallit Nunaanni ilineqarfissaanut assartuinermut malittarisassanik iluarsiiviginnissinnaannerannut tunngasumik.
– Apeqqutit amerlaqaat, Ruth Heilmann oqarpoq, nassuiaammillu suliaqartoqarnissaa pisariaqarpoq. Isumaqarpunga pineqartumut aaqqiissutissani Kalaallit Nunaanni innuttaasut tamarmik assigiimmik pineqartussaanerat aallaavigineqartariaqartoq.