Toqutsineq pillugu suliaq: Angut tigusarineqarsimavoq - arnaq kinaassusersineqarpoq
Arnaq sisamanngornermi Sisimiuni toqungasoq nassaarineqartoq pillugu suliami politiit angummik tigusaqarsimapput.
Arnaq Sisimiuni toqungasoq sisamanngornermi ullup-qeqqanut nassaarineqarpoq, politiillu toqunneqarsimasorivaat.
Politiit sisamanngornermi ualikkut suliamut atatillugu angummik tigusaqarsimapput. Politiit KNR-imut taamatut ilisimatitsipput.
Misissuisarfimmi pisortap Jan Lambertsenip Sermitsiaq.AG-mut itisiliilluni oqaatigaa, angut inuusuttoq najukkameersoq matumani pineqartoq.
Politiinit maanna suliarineqarpoq angutip inatsit tunngaviusoq naapertorlugu killisiorneqarnissaa kingusinnerusukkullu tigummigallassanngortinneqarnissaa. Toqutsisimasutut unnerluutigineqassasoq, Lambertsen ilisimatitsivoq.
Jan Lambertsenip ilanngullugu ilisimatitsissutigaa, arnaq toqutaasimasoq kinaassuserneqarsimasoq, ilaqutaalu ilisimatinneqarsimasut. Arnaq najukkameersoq 56-inik ukiulik matumani pineqarpoq.
Jan Lambertsen tamatuma saniatigut misissuisoqarnera pissutigalugu paasissutissanik allanik ssaqqummiusserusunngilaq.
Jan Lambertsenip Kalaallit Nunaanni Politiit misissuisarfiani pisortaasup Sermitsiaq.AG-mut oqaatigaa, suliap suliarneqarnerani politiit paasisaqarnissartik neriuutigigaat:
- Takussutissaateqarpugut misissoqqitassatsinnik, taamaammat paasisaqarnissarput neriuutigaarput, Jan Lambertsen ippassaq taamatut oqarpoq.
Politiit sisamanngornermi ullup-qeqqata siornatigut nalunaaqutaq 09.56 nalunaarfigineqarput arnaq toqungasoq nassaarineqarsimasoq pillugu. Arnaq Sisimiuni Kaaleeqqap Aqqutaani nassaarineqarsimavoq.