Toqutsinermik suliami tigusaasoq politiinit iperagaasoq
Nuummi arnamik toqungasumik siumuisoqarneranut atatillugu angut 30-nik ukiulik tigusarineqartoq arfininngornermi iperagaavoq.
Kalaallit Nunaanni Politiit arfininngornermi ualikkut paasissutissiipput, angut 30-nik ukiulik Nuummi Ceresvejimi inissiamik ikuallattoqarneranik suliami tigusarineqarsimasoq, ullumi nalunaaqutaq 14 iperagaasoq.
Angut ikulatsitsisimasutut toqutsisimasutullu pasineqartoq, pingasunngormat Nuummi Sermersuup Eqqartuussisoqarfiani inatsisit tunngaviusut naapertorlugit killisiorneqartussatut sassartinneqarpoq, tassanilu pinngitsuunerarluni. Taamaakkaluartoq angutip akunnerni 72-ini tigummigallarneqarnissaanik unnerluussisup piumasaqaataa akueriniarlugu eqqartuussisoqarfik aalajangerpoq.
Ullut pingasut qaangiunneranni paasiniaanerup maanna killiffiani angut 30-nik ukiulik, Nuummi Ceresvejimi arnamik 82-inik ukiulimmik toqutsisoqarsimaneranut atatillugu marlunngornermi tigusarineqartoq, iperagaassasoq politiit aalajangersimapput, vicepolitiinspektør Lars Bjerregaard paasissutissiivoq:
- Paasiniaaneq eqqarsaatigalugu sooq angut iperagaasimanersoq qanimut iserfigisinnaanngilara, oqaatigisinnaavarali sulimi suli pasisaammat, aamma paasiniaaneq ingerlateqqissagatsigu.
Danmarkimeersunik ikiorteqartut
Kalaallit Nunaanni Politiit tallimanngornermi paasissutissiipput, paasiniaanermut atatillugu Danmarkimit ikiuukkiartortunik tikittoqarsimasoq, pineqartullu ilaatigut tassaasut Københavns Politiinit paasiniaasartut, kriminalteknikerit aamma qimmeq ikuallattoqarsimatillugu misissuisinneqartartoq, ikuallassimasumi takussutissanik ujaasisussaq.
Tamatuma saniatigut nakorsanik toqusut timaannik misissuisartunik ikiuuttoqarpoq, taakkualu arnap toqusup timaa misissussavaat toquneranullu pissutaasimasoq paasiniarlugu.