Toqutsinermut tunngasumi nassuertuusaartut sisamat
Inuit sisamat imminnut politiinut nalunaarutigisimapput februarip 3-anni Sisimiuni Louise Hegelundimik toqutsinermut akisussaasutut. Teknikkikkulli uppernarsaatissat takutippaat takkua toqutsisuusinnaanngitsut.
- Teknikkikkut pitsaasunik uppersarsaatissaqarsimanngitsuugutta upernaap ingerlanerani imminnut nalunaarutiginnittut sisamat pinngitsuunerat paasiuminaatsissimassagaluarparput, Sisimiuni politeeqarfiup ittua Hans Falck Petersen oqarpoq.
Tamanna peqatigalugu erseqqissarpaa eqqunngitsumik nassuerneq kinguneqarsinnaasoq.
- Paasissutissat toqutsiffimmut, piffissamut arlalinnullu allanut naapertuussimasuuppata pisuunngitsoq unnerluutigeratarsimasinnaagaluarparput, Hans Falck Petersen tikkuaavoq.
Taassuma tupigusuutigisorujussuuvaa inuit pisuunngitsut sooq toqutsinermut akisussaasutut imminnut nalunaarutiginersut.
- Inuinnaavungami, immaqali sammitikkusunnersuaq nassuiaatissamut ilaavoq. Immaqa isumaqartoqarpoq oqaluttuaq utertinneqarsinnaasoq, Hans Falck Petersen isumaqarpoq.
Angut 19-inik ukiulik tunngavissalimmik pasilliineq pissutigalugu tigusarineqarpoq suliassamullu atatillugu pinerluttulerinermi inatsimmi paragraf 51 malillugu toqutsisimasutut unnerluutigineqarluni.