Toqutsinermut ukiut arfinillit
Qallunaaq 42-nik ukiulik marsip 11-ani 2009 arnamik kalaallimik arnaatigisimasaminik qimitsilluni toqutsisoq, Nuup eqqartuussiaviani december 2009-mi ukiuni arfineq marlunni pinerluuteqarsimasunut inissiisarfimmiittussasut eqqartuunneqarpoq. Nunatta Eqqartuussiviani ulumikkut pillaaneq ukiunut arfinilinnut sivikillineqarpoq.
Angutip qallunaap 42-nik ukiullip sapaatip akunnialuinnaani nunatsinnissimasup 2009-mi marsip 11-ani arnaq kalaaleq arnaatigisimasani 34-nik ukiulik qimillugu toqupaa. Unnuk taanna tigusarineqarpoq, aqaguarnilu inatsit tunngaviusoq naapertorlugu killisiorneqarami qimitsisimanini nassuerutigaa.
Suliaq Nuup Eqqartuussiviani decembarip 10-ani 2009 suliarineqarpoq, tassanilu ukiuni arfineq marlunni pinerluuteqarsimasunut inissiisarfimmiittussatut eqqartuunneqarluni, tamannalu Nunatta Eqqartuussivianut suliassanngorteqqippaa.
Maannakut suliaq Nunatta Eqqartuussiviani aalajangiivigineqarpoq, pineqaatissiinerlu ukiuniit arfineq marlunniit arfinilinnut sivikillineqarpoq.
42-nik ukiulik nakuusersimasutut toqutsisimasutullu unnerluutigineqarpoq.
- Kalaallit Nunaanni toqutsineq ukiunik tallimanik pineqaatississutaasarpoq. Pineqaatissiinissamik sakkortusaataavoq, unnerluutigineqartup arnap ilisimajunnaarneraniit suli minutsip affaani qimitsiniarnini ingerlassimmammagu. Aamma sakkortusaataavoq, arnaq qimereerlugu suli qungasiatigut qajannaaqqissimammagu, nunatsinni eqqartuussisoq Søren Søndergaard hansen eqqartuussinerup nalunaarutiginerani oqarpoq.
42-nik ukiullip ukiumik ataatsimik sivisunerusumik pineqaatissinneqarnera peqquteqarpoq, marsip 3-ani toqusumut nakuuersimanini peqqutigalugu, politiit akuliuffigisaani. Nunatta Eqqartuussivianit nalilerneqarpoq, pillaanissamik sakkortusaataasoq, 42-nik ukiulik arlaleriarluni nakuusernini peqqutigalugit pineqaatissinneqareersimammat, taamaattumik pinerluuteqarsimasunut inissiisarfimmiittussanngortinneqarpoq ukiuni arfinilinni.
- Isumaqarpunga nunatta eqqartuussiviata aalajangiinera oqimaaqatigiittuusoq. Aallaaviuvoq toqutsinerup ukiunik tallimanik pineqaatissiissutaasarnera. Toqutsinerup saniatigut aamma nakuusersimasoq toqutsinerup siuninngua. Aamma pineqaatissiinnermut sakkortusaataavoq Danmarkimi arlaleriarluni nakuusersimanerminut pineqaatissinneqartarsimanera. Nunatta eqqartuussiviani aalajangiinerup takutippa, Kalaallit Nunaanni toqutsineq ukiuni tallimani pineqaatissiissutaasarnera, illersuisoq Jakob Lund Poulsen oqarpoq.
Qallunaaq 42-nik ukiulik siusinnerusukkut nunatsinniissimanngitsoq, arnaatini kalaaleq peqatigalugu Nuummut nuuppoq februaarip 19-ani 2009. Neqaarniarfiuteqarsimavoq, nunatsinnut nuulerani tunisaminik.
Aappariit ukioq ataaseq sioqqullugu internet aqqutigalugu naapissimapput, aapparinnerallu nakuusernertaqaqaluni. Marsip pingajuani qimassimapput, aatsallu naapeqqillutik unnummi toqutsiffimmi.