Toqutsisisutut sulianilu allani 19-ini pisuutinneqartoq: Ukiuni arfineq-pingasuni pineqaatissinneqassasoq
Angut persuttarneqarnerminit qaammatit arfineq-pingasut qaangiunneranni toqummat, persuttaasimasoq toqutsisimasutut eqqartuussaavoq. Eqqartuussiviup aalajangerpaa angut ukiuni arfineq-pingasuni pinersluuteqarsimasunut inissiisarfimmiitinneqassasoq.
Angut 30-t ataallugit ukiulik toqutsisimasutut pinerluutinullu allanut 19-inut tunngatillugu eqqartuunneqarami ukiuni arfineq-pingasuni pinerluuteqarsimasunut inissiisarfimmiitinneqartussanngorpoq. Ulluni pingasuni eqqartuussisoqareersorlu, Sermersuumi Eqqartuussiviup pineqaatissiissut aalajangerpaa.
- Toqutsisimasutut eqqartuunneqarnini akueraa nassuerutigalugulu. Eqqartuussinermi ullormi kingullermi naggasiinermi sammisatuaraarput qanoq sivisutingisumik pineqaatissinneqassanersoq. Pineqaatissiissut eqqartuunneqartup unnerluussisussaatitaasullu akueraat, suliarlu taamaasilluni naammassivoq, unnerluussisussaatitaasoq, Lars Petersen Sermitsiaq.AG-mut oqaluttuarpoq.
Angut immikkoortuni 20-ni assigiinngitsuni pinerlussimasutut eqqartuunneqarpoq, taakkunani eqqartuussut sakkortunerpaaq tassaalluni toqutsisimaneq. Eqqartuunneqartoq imigassartorsimanermi nalaani angummut julimi 2022-mi sakkortuumik persuttaasimavoq. Persuttarneqartoq persuttarneqarnerminit qaammatit arfineq-pingasut qaangiunnerani ilisimmaqqissimanani toquvoq.
- Suliap immikkuullarequtigilluinnarpaa sakkortuumik persuttaasoqarneranit qaammatit arfineq-pingasut qaangiunneranni persuttarneqarsimasoq ajoqusernerminik toqquteqarmat. Persuttaanermut suliaq toqutsisimanermut suliassanngorpoq. Suliat taama ittut qujanartumik qaqutigoorluinnarput, Lars Petersen oqarpoq.
Pinerluuteqartareersoq
Angut eqqartuunneqartoq hashimik tigummisaqarsimasutut, persuttaasimasutut, tillinniarsimasutut aqqusinermilu angallannermi inatsisinik unioqqutitsisimasutut aamma eqqartuunneqarpoq.
- Eqqartuunneqartoq siornatigut assingusunik pinerluuteqartarsimavoq pineqaatissinneqartarsimallunilu. Persuttaalluni tillinniarlunilu pinerluttareersimanera soorunami pineqaatissiissummut sakkortunerusumik inissitsitsivoq. Eqqartuussiviup unnerluussisussaatitaasup kissaataa malillugu pineqaatissiinera soorunami iluarisimaarparput, unnerluussisussaatitaasoq Lars Petersen Sermitsiaq.AG-mut oqarpoq.
Sermersuumi Eqqartuussiviup unnerluussutit 20-iusut, 21.-23. august suliarai aalajangiiffigalugillu. Angut unnerluussutini tamani pisuutinneqarpoq pineqaatissinneqarlunilu.
Angut maanna tigummigallarneqaqqippoq, pineqaatissiissutillu atuutilernissaa maanna utaqqillugu.