Toqutsisoq eqqarsartaatsimigut misissorneqassaaq
22-nik ukiulik februaarip arfineq-aappaat Nutaarmiuni inunnik pingasunik toqutsisoq sapaatit akunneri sisamat suli tigummineqarallassaaq
Toqutsisimasutut politiinit tigummisaagallartoq Kunuunnguaq Korneliussen Nutaarmiuneersoq aanamik 75-inik ukiulimmik taassuma panianik 31-nik ukiulimmik niviarsiaraataannillu arfineq-pingasunik ukiulimmik inuartup eqqartuunneqarnissaanut piffissaq suli ungaseqaaq.
Unnerluussisut Dronning Ingridip Napparsimavissuanit nakorsat oqaaseqaataat utaqqivaat, taakkua eqqartuussassap eqqarsartaatsimigut akornuteqarneranik misissuinissamik tunngaviliissapput.
Kunuunnguaq Korneliussen unnerluussisut piumasaqaataannut akerliussutissaqarsimanngilaq. Tamassuma kinguneranik Risskovimi Retspsykiatrisk ambulatoriummimut nassiunneqarnissani naatsorsuutigisariaqarpaa.
Tassani uninnganeq sivikinnerpaamik qaammatini marlunni pisarpoq.
Eqqarsartaatsikkut misissuinermi paasiniarneqassaaq Kunuunnguaq Korneliussen toqutsinermi nalaani tarnikkut pissusaa qanoq issimanersoq, tassa toqutsinermi nalaani niaqulaarsimanersoq, tamatumalu nassataanik pinerluttaalisitsinermik inatsit naapertorlugu pineqaatissinneqarsinnaanaviarani imaluunniit misissuinermi paasineqassaaq pineqaatissinneqarsinnaanersoq.
Maannamut Upernavimmi eqqartuussiviup Kunuunnguaq Korneliussenip sapaatip akunneri sisamani suli tigummineqarallarnissaa aalajangiuppaa.
Teknikkikkut misissuinerit
Piffissamik sivitsuinermut pissutaavoq inuit pingasut toqutaanerannit inuillu sisamat toqoriaraluarneqarnerannit teknikkikkut misissuineq suli ingerlarsormat.
Upernavimmi eqqartuussisuugallartoq Elisabeth Kruse naapertorlugu eqqartuussivimmit toqutsiffimmit toqutsisullu angerlarsimaffianit misissukkat suli naammassivinngillat.
- Toqutsinermi sakkup atorneqarsimasup teknikkikkut misissuiffigineqarneranit inernerit suli amigaatigaagut, Elisabeth Kruse oqarpoq.
- Taanna aamma ilisimatitsivoq pinerlunnerit ima sakkortussuseqaraangata allaat pinerluttup eqqarsartaasiata akornuteqarsinnaanera ilimanaateqartillugu eqqarsartaammik misissuinissaq kissaatigineqakkajuttartoq, soorlu toqutsisoqartillugu.
Qaquguussagaluarnersoq suliamik eqqartuussisoqalerpat eqqartuussisoq tassatuaavoq Kunuunnguaq Korneliussenip parnaarunneqarnissaanik imaluunniit katsorsartinnissaanik aalajangiisussaq.
Kunuunnguaq Korneliussen, inunnik pingasunik toqutsisimasutut allanillu sisamanik toqutseriaraluarsimasutut unnerluunneqarnini akueraa.