Toqutsisoqarsimanerani suliaq: Arnaq suli sapaatip-akunnerini sisamani tigummigallarneqassasoq
Sermersuup Eqqartuussiviani februaarip aallaqqaataani aalajangerneqarpoq, arnaq 41-nik ukiulik Tasiilami angummik 48-nik ukiulimmikt toqutsisimasutut unnerluutigineqartoq, suli sapaatip-akunnerini sisamani tigummigallarneqassasoq.
Arnap 41-nik ukiullip Tasiilami angummik 48-nik ukiulimmik toqutsisimasutut unnerluutigineqartup tigummigallarneqanera sapaatip-akunnerinik sisamanik sivitsorneqarpoq.
Sermersuup Eqqartuussivia februaarip aallaqqaataani taamatut aalajangersimavoq.
- Sermersuup Eqqartuussiviani ulloq 1. februar aalajangiunneqarpoq, arnap tigummigallarneqarnera ullunik 28-nik sivitsorneqasasoq. Unnerluussisussaatitaasut arnap tigummigallarneqarnerata sivitsorneqarnissaa piumasarisimavaat, tamannalumi eqqartuussivimmit akuerineqarluni, Malik sandgreen Kommuneqarfik Sermersuumi poliini immikkoortunut pisortaq Sermitsiaq.AG-mut ilisimatitsivoq.
Tigumminnikkallarnerup sivitsorneqarnissaa allaffissornikkut ataatsimiinnermi aalajangiunneqarsimavoq. Tassa unnerluussisussaatitaasup, unnerluunneqartup unnerluunneqartullu illersuisuata arnap tigummigallarneqarnerata sivitsorneqarnissaa isumaqatigiissutigisimavaat, taamaalillutillu tigumminnikkallarnerup sivitsorneqarnissaa pillugu eqqartuussivimmi najuutinngikkaluarlutik aalajangiiffigisinnaasimallugun.
Misissugassatut tiguneqarsimasut arlallit Danmarkimi misissoqqissaarneqassasut
Kalaallit Nunaanni Politiit ataasinngornermi ulloq 3. januar 2022 nalunaaqutaq 17.10 nalunaarfigineqarput, angut Tasiilami inissiami ataatsimit toqungasoq nassaarineqarsimasoq.
Tamatuma kingorna arnaq 41-nik ukiulik toqutsisimasutut tigusarineqarlunilu unnerluunneqarpoq.
- Danmarkimi pinerluuteqarsimanermi misissuisartut Tasiilami politiit misissuinerannut ikiuussimapput, aamma toqusup timaanik misissuisartup toqungasup timaa misissorsimavaa. Pinerluuteqarsimanermi misissuisartut toqusullu timaanik misissuisartoq Danmarkimut utereerput. Misissugassat tiguneqarsimasut arlallit Danmarkimi misissoqqissaagassanngorlugit nassarsimavaat. Misissueqqissaarnermi akissutit ingerlaavartumik pissarsiarineqartartut, Malik Sandgreen ilisimatitsivoq.
Kalaallit Nunaanni Politiit misissuisoqarnera eqqarsaatigalugit maannakkorpiaq oqaaseqarsinnaannginnerarput.