Toqutsisutut unnerluunneqartoq ulluni 28-ni tigummigallarneqassaaq
Angut 27-nik ukiulik arnamik 65-inik ukiulimmik toqutsisimasutut pasineqartoq ulluni 28-ni tigummigallarneqassasoq Kujallermi eqqartuussivik aalajangerpoq.
Arnaq 65-inik ukiulik Nanortalimmi silami toqungasoq sapaatiummat ullaap tungaani nassaarineqarpoq. Politiit sapaatiummat unnukkut nalunaaruteqarput angut 27-nik ukiulik toqutsisimasutut pasisartik tigusarisimallugu.
Angut 27-inik ukiulik Kujallermi eqqartuussivimmi inatsit tunngavigalugu ullumi nal. 12.00 killisiorneqalerpoq. Eqqartuussivik aalajangerpoq angut ulluni 28-ni tigummigallarneqassasoq. Unnerluunneqartoq suliami pinngitsuunerarpoq.
Politiit Sermitsiaq.AG-mut taama ilisimatitsipput.
Paasiniaaneq suli ingerlavoq
Kalaallit Nunaanni Politiit unnerluunneqartoq arnarlu 65-inik ukiulik qanoq imminnut ilisarisimanersut pillugit oqaaseqarsinnaanngillat, suliamilu paasiniaaneq pillugu aamma oqaaseqarsinnaanatik.
Killisiuineq matoqqasumik ingerlanneqarpoq.
Politiit ilisimatitsipput paasiniaaneq suli ingerlanneqartoq. Takunnissimasinnaasut suliamullu soqutiginaateqarsinnaasunik ilisimasallit politiinit suli oqaloqatigineqarumapput. Politiinut saaffiginnittoqarsinnaavoq oqarasuaammut 701448.
Kommune Kujallermi najukkami siunnersuisoqatigiit aamma Kalaallit Nunaanni Politiit najukkami toqqissisimatitsiniarlutik suliaqarput. Innuttaasut suliamut tunngatillugu toqqissisimanngitsut ilaqutariit illuannut saaffiginnissinnaasut, politiit ilisimatitsipput.