Transfer pricing pillugu nalunaarusiorneq naammassineqassanngitsoq
Naalakkersuisut transfer pricing pillugu inatsimmik nalilersuinissaq naammassillugu suliarineqassanngitsoq aalajangersimapput.
- Ukiorpassuarni nunatsinni transfer-pricing atuunnersoq pillugu politikkikkut oqallittoqartaqaaq, Siumumi siulittaasoq Erik Jensen Naalakkersuisunut allappoq.
Partiimi siulittaasup paaserusussimavaa, transfer pricingimut malittarisassat pillugit nalunaarusiaq Naalakkersuisunit naammassillugu suliarineqarniarnersoq.
Transfer pricing tassaavoq, suliffeqarfissuit nioqqutissanik nunat killeqarfii akimorlugit suliffeqarfissuup iluani niuerutigineqartartunik naliliinermi politikkikkut akuliuttoqartannginnissaanik piumasaqaammik malinninnissaq.
Transfer pricing suliffeqarfissuup imminermini niueruteqaraangami nunami appasinnerusumik akileraartarfiusumi assersuutigalugu immikkoortortaqarfimminut sinneqartoorutinik "nuussinermigut" annikinnerusunik akileraaruteqarnissaanut atatillugu atorneqakkajuttarpoq.
Suliaq nangeqqinneqarsimanngitsoq
Pineqartumut atatillugu nunami maani malittarisassat nutaat 2019-ip aallartinnerani atuutsinneqalerput, Inatsisartullu taamanikkut aalajangerput nalilersuisoqassasoq, nalilersuisimanerlu 2021-mi Inatsisartunut agguaanneqassasoq.
Erik Jensenilli nalilersuisimanermik tigusaqarnissani naatsorsuutigissanngilaa, Naalakkersuisummi qinersisoqareersoq nalunaarusiap suliarineqarnera nangissimanngilaat.
- Siunnersuutit atulersinneqanngitsut, ginersinerup nalaani atorunnaartarnerat nalinginnaavoq, aatsaalli Naalakkersuisut nutaat suliaq qageqqikkaangassuk ingerlaqqilertarlutik, Aningaasaqarnermut Naalakkersuisoq Naaja H. Nathanielsen (IA) aallappoq.
- Nunat assigiinngitsut akornanni pitsaassusermi piumasaqaataannut naapertuuttut
Naalakkersuisup itisilerlugu oqaatigaa, nalilersuisimanerup takutissimagaa, Kalaallit Nunaanni malittarisassaritinneqartut nunani assigiinngitsuni pitsaassusissatut piumasaqaataasunik malinnittuusut:
- Qinersinerup nalaani malittarisassat OECD-p nunat assigiinngitsut akornanni pitsaassusermi piumasaqaataannut naapertuuttut nalilerneqarput.
Naalakkersuisup oqaatigaa, malittarisassanik nutaanik nalilersuilersinnani ukiut arlallit ingerlaqqaartariaqartut, aamma qinersivimmi matuamni pineqartoq ukkatarineqarniartoq:
- Naalakkersuisut taamaalillutik inuussutissarsiornermi akileraarusiinermut malittarisassanik suliaqarnerminni transfer pricingimik malittarisassat sammineqarnerat ilanngutissavaat. Taamaammat immikkut tamanna nalunaarusiarineqassanngilaq, suliarineqassaarli, naalakkersuisoq Erik Jensenimut allappoq.