Troels Lund Poulsen illersornissamut isumaqatigiissut pillugu: Periarfissat allat eqqarsaatigaagut
Issittumi sakkutooqarnikkut aningaasaliinissaq pillugu Troels Lund Poulsen ersarinnerusumik oqaaseqarsinnaanngikkallarpoq, dronelli nakkutilliissutinut taarsiullugu periarfissaasinnaasunik eqqarsaatersuuteqartoqartoq oqarpoq.
Illersornissamut ministeriugallartoq Troels Lund Poulsen (V) Issittumi illersornissamut aningaasaliissutit qanoq atorneqassanersut suli oqaatigisinnaanngikkallarpaa. Isumaqatigiissut ukiup naalernerani inissittussaavoq.
- Aningaasaliinissaq pillugu Naalakkersuisut qanimut oqaloqatigaagut. Ullumi aqaguluunniit isumaqatigiissut inissinnavianngilaq, siunissamili inissikkumaarpoq, Troels Lund Poulsen Nuummi Arktisk Kommandomi tusagassiortunut paasititsigami oqarpoq.
Nordsøen imaluunniit Issittorluunniit, sorleq annertunerusumik aningaasaliiffigineqassanersoq oqaatigisinnaanngilaa.
- Marluk pingaarnersiortariaqarput. Siulleq tassa naalagaaffeqatigiinneq, isumanni annikippallaamik pingaarnersiorneqartarsimasoq. Ukraine 22. februar 2022 saassunneqarmalli naalagaaffeqatigiinnerup iluani sillimaniarnermut politikki pingaarnersiorneqarnissaa pisariaqarnerulersimavoq. Østersøenili NATO-mut ilaasutut inissisimalermat aamma pingaarnersiortariaqarpoq.
Sumiiffiit pingaaruteqartut
Danmark Europap avataani sumiiffimmiinnerusimagaluartoq, maanna Issittumi aamma Østersømiinnerulernissaa Troels Lund Poulsenip naatsorsuutigaa.
MInisterip oqaatigisinnaanngilaa aningaasat qanoq pingaarnersiorneqassanersut, oqaatigaluguli pigisat aserfallattut taarserneqarnissaannut, Arktisk Kommandop angallataannut, sulisussaqarniarnermut aamma dronenut aningaasaliinissamut atorneqassasutut akuersissutaasimasut.
- Dronenut 750 mio. koruunit atorneqartussatut illikarneqarsimapput. Aningaasaliinerunissarli pisariaqartoq paasinarsivoq, taamaammat dronet allalluunniit atorneqassanersut maanna misissorneqarpoq.
Timmisartut inuttalikkat atorsinnaanerlutik?
- Eqqarsaatersuutit assigiinngillat, illersornissaq pillugu isumaqatigiissuteqarnissami partiit isumaqatiginninniartussat attaveqarfigineqassapput. Aasaanerani sulinngiffeqareernerup kingorna tamakku oqaluuserineqassapput, aningaasat nassaarineqareerpata. Illersornissamut aningaasaliinissamut aningaasat naammattut pigilernissaat maanna pingaaruteqarpoq.