True North Gems qalluinissamut akuerisaavoq

Qeqertarsuatsiaat eqqaanni Aappaluttumi rubinisiorfissap sanaartorfiginera ukiormanna aallarterataannaavoq suliniummut aningaasaliiusumik True North Gems pissarsippat. Sanaartornerup nalaani suliffiit nutaat 40-50-it pilersinneqassapput.

Rubinisiornissap avatangiisinut sunniutissai pillugit misissuineq aamma inuiaqatigiinni nammanneqarsinnaaneranut nalunaarusiaq Naalakkersuisut akuersissutigaat. Maannalu tassa qalluinissamut akuersissut atsioqatigiissutigineqarpoq.

- Suliffeqarfiup naatsorsuutigaa qalluinerup ukiuni qulingiluani ingerlanissaa, inuussutissarsiornermut aatsitassanullu naalakkersuisoq Jens-Erik Kirkegaard Siumumeersoq Naalakkersuisut sinnerlugit ataasinngornermi ullaap tungaa atsiornermini oqarpoq.

Aatsitassarsiorfeeraq
Isumaqatigiissutip assilinera True North Gemsip Torontoimi Canadami qullersaqarfianut nassiunneqareerpoq suliffeqarfissuullu pisortaaneranit Nicholas Houghtonimit ataasinngornermi ullaap tungaa atsiorneqarluni.

Suliniummut 2004-mili misissorneqalersumut aningaasaliisussarsiorneq True North Gemsip suliassarilerpaa. Naatsorsuutigineqarpoq inuit 40-50-it sulisoralugit aatsitassarsiorfissaq sanaartorfiussasoq qalluinerlu aallartippat ilimagineqarpoq inuit 80-it sulisorineqarnissaat naatsorsuutigineqarluni.

- Isukasiani saviminissamik aatsitassarsiorfissarsuarmut sanilliullugu una mikisunnguuvoq. Aatsitassanut inatsit malillugu ukiuni 30-ni qalluinissamut isumaqatigiissusiortoqarsinnaavoq, kisianni tassa True North Gemsip naatsorsuutigaa ukiuni qulingiluani qalluinissani, Jens-Erik Kirkegaard oqarpoq.

Maanna Kommuneqarfik Sermersooq, Namminersorlutik Oqartussat aamma True North Gems IBA-mik taaneqartartumik isumaqatigiissusiussapput tassanilu aalajangersorneqassapput nunaqavissut suliffeqarfiutaasa, nunaqavissut sulisorineqarnissaat ilinniartinneqarnissaallu pillugit sinaakkusiisoqassaaq.