Trump Nato pillugu oqaaseqarmat Det Hvide Hus-imit paatsiveerusimaarneragaavoq
Nato Ruslandimit saassunneqarsinnaanera pillugu Donald Trumpip oqaaseqaatai Det Hvide Hus-imit assuarineqarput.
USA-p præsidenterisimasaata Donald Trumpip arfininngormat qinersisartunik ataatsimiisitsinermini Nato Ruslandilu pillugit oqaaserisai Det Hvide Hus-ip akerlilerpai.
Taamatut oqarpoq Det Hvide Hus-imi oqaaseqartartoq Andrew Bates.
- Iligiit saassussinissaannik kajumissaarinera amiilaarnaqaaq paatsiveerusimaarnartuullunilu, oqaaseqartartoq oqarpoq.
Trumpip oqaasii South Carolinami qinersisartunik ataatsimiisitsinermi oqaatigineqarput, tassani præsidentiusimasup Nato-mi siulersuisunik præsidentiunermini ataatsimeeqateqarsimanerminik eqqaasaqarmat:
- Nunami angisuumi præsidenti nikuippoq oqarlunilu: "Akiliinngikkutta Ruslandimit saassunneqassaagut - taava illersussavitigut?’”
- Akivakka: "Akiliinikuunnginnavit?" Akivaanga: "Aap, taamaassimagunarpoq." "Naamik, illersornianngilakkit. Qanorluunniit piumasamittut iliorsinnaasut kaammattussavakka, kisianni akiliisariaqarputit."
USA-p præsidenterisimasaa arlaleriarluni Europami NATO-mi nunat kajumissaartarpai USA-mit pilersorneqaratik imminnut illersorniarlutik sakkutooqarnermut aningaasartuutit amerlisaqqullugit.
Ruslandip 2022-mi februaarimi Ukrainemik tiguaanerata kingorna Nato-mi nunat arlallit, ilaatigut Danmark, sakkutuunut aningaasartuutitik amerlisippaat.
NATO-mi nunat ilaasortaasut nunap aningaasartuutaasa 2 procentii illersornissamut atussagaat anguniarneqarpoq. Danmarkip anguniagaq tamanna ukiorpassuarni angusimanngilaa.
Siorna illersornissamut isumaqatigiissut naapertorlugu piffissami 2024-miit 2033-mut 155 milliardit koruuninik illersornissamut aningaasaliisoqassaaq, taamaalillunilu anguniagaq tamanna anguneqassaaq.
Ruslandip Ukraine ajugaaffigissappagu Nato-mut ilaasortaasumik saassussinissaanik ernumassuteqarnertik Europamit nunat arlallit aallartitat immikkut ilisimasallit ersersissimavaat.
NATO-mi suleqatigiinnermi tunngaviusumik isumaqatigiissutigineqarpoq nunat ilaasortaasut saassunneqarunik imminnut illersorniarlutik pisussaasut. Tamanna Washingtonimi isumaqatigiissummi 1949-meersumi, immikkoortortat tallimaanni, "musketeredimik" taaneqartumi, qulakkeerneqarpoq.
/ritzau/