Trumpip pisortaqarfiani siuttuusimasoq: Danmark Kalaallit Nunaanni iliuuseqarnerusariaqarpoq

Illersornissamut sillimaniarnikkullu politikkimut tunngatillugu Danmarkip Kalaallit Nunaannik suleqateqarnermini ersarinnerusunik killiliisariaqarpoq.

Danmarkip Natomi iliminut pisussaaffimminik naammassinninnissaq qulakkeerniarlugu aamma Natop avannani sakkutooqarnikkut russit sakkortusaarniarnerannut sillimanissamik qulakkeerinninniarluni taamaaliortariaqaraluarpoq.

Alexander B. Gray atuagassiami Foreign Policymi nalilersuinermini, TV2-p allaaserisaani taama oqaaseqarpoq. Alexander B. Gray, Donald Trumpip præsidentiunerata nalaani Det Hvide Husimi USA-mi Sillimaniarnermut siunnersuisoqatigiinni pisortaasimavoq. Ullumikkut American Foreign Policy Councililimi siunnersortaavoq.

- Natomi suleqatit mianernarsitinneqartut

Natomi avannaani sakkutooqarnikkut arlalinnik qajannartoqartoq, Alexander B. Gray isumaqarpoq, tassani Svalbard, Savalimmiut aamma Kalaallit Nunaat ilaapput.

Taassuma ilaatigut russit aalisariutaasa isertortumik paasiniaanermut atorneqarsinnaanerannik pasilliuteqartoqarneranik ajornartorsiut oqaatigaa, taakkulu aamma akornusersuisinnaasut Ukrainemi saqitsaattoqarnerani Thorshavnimut suli tikissinnaanerat oqaatigalugu.

- Københavnip suliamut pisinnaalluartumik iliuuseqarsinnaanerata killeqarnera Natomi iligisaminut avannaani sakkutooqarnikkut russit periuseqarsinnaanerannut sunniuteqartitsivoq, Alexander B. Gray, inissisimaneq pillugu allappoq.

Ersarissunik killiliissasoq

Kalaallit Nunaata namminersortuunerata annertusinera ilutigalugu, nunap avataanit sunnerneqarsinnaassusaa aamma annertusisimasoq, Kalaallit Nunaannut tunngatillugu taama isumaqarpoq.

- Københavnip oqartussaanerata annikilliartornera naalagaaffissuit nunarsuarmi qeqertat annersaat pillugu unammilleqatigiinnerannut annertuumik periarfissiivoq, Alexander B. Gray allappoq.

Natop soqutigisai pineqartillugit danskit naalakkersuisui ”annertunerusumik ataqatigiissaarisariaqartut”, taanna isumaqarpoq:

- Kalaallit Nunaata Danmarkillu akornanni attaveqatigiinnerup ineriartornera malillugu, København nunani tamalaani ersarinnerusunik killiliisariaqarpoq, tassani soqutigisat pingaarutillit aamma Natomi iligisat soqutigisaat pineqarput, Alexander B. Gray, naliliinermini taama allappoq.

Sillimaniarnermut politikkimi eqqissiviilliorneq

Sillimaniarnermut politikki Danmarkip Kalaallit Nunaatalu akornanni arlaleriarluni isumaqatigiinngissutaasarpoq.

Kingullermik Naalakkersuisut siulittaasuata Múte B. Egedep (IA) juulip qeqqani Danmark isornartorsiorpaa, Kalaallit Nunaat Helsinkimi ataatsimiinnermut qaaqquneqannginnera pissutigalugu. Nunat avannarliit aamma USA-p præsidentiat Biden tassani ataatsimiipput, taannalu Østersøenimi aamma Issittumi sillimaniarnermut politikkimut tunngavoq.

Kristian Søby Kristensen, Københavns Universitetimi Center for Militære Studierimi ilisimatusartuuneq, pingaarnertut Alexander B. Grayip naliliineranut isumaqataalluni TV2-mut oqarpoq, kisianni naalagaaffeqatigiinnermi politikkikkut pissutsit pissutigalugit, Kalaallit Nunaannut Savalimmiunullu iliuuseqarnissaq danskit naalakkersuisuinut ”ajornakusoortorujussuussasoq” oqarpoq.