Tûtumit saqqummersitaq nutaaq: 'Astronaut' nutaaliaarpaluttumik nipeqarpoq
Tûtu Kalaallit Nunaanni nipilersortartut pikkorissorpassuit ilaat, saqqummersitamik nutaamik 'Astronaut'-imi nunani tamalaani nipimik atorneqartumik avataarsuaniippalaartumik saqqummersitsivoq.
Nunatsinni nipilersukkat saqqummersitamik nunani tamalaani nipilersoriaatsimik atorneqartumik, nipilersortartup pikkorissup Tûtup 'Astronaut' saqqummersimmagu ilaqqipput.
Saqqummersitaq avataarsuanut angalaneruvoq, avataarsualiartartut angalanerat aamma avataarsuaneersut aamma ilaatigut disko, funk aamma motown maluginiarneqarsinnaapput, nipilersuutivinnik qangalu 80-ikkunni synthesizererpalaartunik akuugaallutik.
Siornatigut Tûtup saqqummersitamini nipilersoriaaseq sallaannerusoq atugarisimagaluarpaa, erinnat tussunngunartut taallallu taartut, ilaatigut erinarsuinnarluni guitariinnarmillu nipilersorlugit. Massakkullu aallaamanerusumik albummimik saqqummersitsivoq.
Nipilersuusiortartoq misilittagalik
Gustav Lynge Petrussen nipilersortartutut Tûtumik taaguuteqartoq, nipilersukkanik immiussinermi Nunatsinni ilisimaneqarluartunik immiussisarnermigut ilisimaneqarluareerpoq.
Nipilersoqatigiinni ÎVAmi Inummilu (INUK). Nalunnginneqarluartunilu Ivaana, Naja P, Nikolaj Lønstrup, îsâvarak Petrussenimilu produceriullunilu immiussisuunikuuvoq, kiisalu 2022-mi aasaanerani nuannarineqarluartoq 'Kisivit' Andachanilu saqqummersinnikuullugu.
Inuusuttunut nipilersortartunut isumassarsiortitsisoq
Tûtu 2018-mili erinniortutut, nipilersortartutut produceritullu inuussutissarsiuteqarpoq, nunatsinnilu taamatut nipilersornerinnarmik inuussutissarsiuteqartut ikittunnguusut ilagivaat.
Taanna piumassuseqarnermini aamma immikkuullarissumik nipimik pilersitsinermik piginnaasaqarnermini, kalaallit nipilersortartut amerlanngitsut nipilersornermik inuussutissarsiuteqartut ilagilerpaat, Kalaallit Nunaanni inuusuttunut aammalu nipilersortartooreersunut isumassarsiortitsisuuvoq.
'Astronaut' maanna digitalimik saqqummersitsivinni tusarnaarneqarsinnaavoq, saqqummersitarlu maluginiagassaavoq, Tûtup nipilersornikkut ineriartorneranik kisimi takussutissiinani, kalaallit nipilersortarnerisa piginnaasaminnik nunani tamalaani imminut tatigaluni saqqummersinnaanermik nutaaliornermillu takutitsimmat.