Politikki
Tukattuliorneq ingerlaqqiinnarpoq
Taamatut isumaqarput IA-meersut Sara Olsvig aamma Naaja Nathanielsen, taakkualu Siumut unnerluuppaat qinikkatut sullissinermik atorunnaarsitsiniartutut partiillu siulittaasuinik nunamik aqutsitsiniartutut
Naalakkersuisuusimasunit massakkut sinneruttut ulluni makkunani tunngavissaqarpiaratik, inunnillu Inatsisartunut qinigaasimanngitsunik ilalersorlutik, aalajangersaasaqattaarput, Sara Olsvig aamma Naaja Nathanielsen atuartartutut allakkaminni allapput, taakkunatigut Siumut sakkortuumik isornartorsiorlugu Naalakkersuisuugallartut pisinnaatitaaffimminnik qaangiinerarlugit, tassa namminersorlutik oqartussat pisariaqarnerpaaginnarmik ingerlannissaannut inatsisitigut pisussaaffeqarmata.
"Naalakkersuisuugallartut nutaanik pingaarutilinnik naalakkersuinikkullu saqitsaassutaasunik aalajangersaasinnaanngillat. Tamanna inatsisitigut aalajangersagaavoq! Pineqartoq tassaavoq Naalakkersuisut ataasiakkaat ataatsimoortulluunniit qinersisoqalivinnerani sorpassuarnik aalajangersaasannginnissaat, IA-rmiut taakkua marluk allapput.
Sara Olsvigip Naaja Nathanielsenillu pingaartumik isornartorsiorpaat inuit Inatsisartunut ilaasortaanngitsut nunamik aqutseqataanerat. Innersuussutigaat Naalakkersuisut partiit siulittaasuinik, aalajangigassat, Naalakkersuisut kisimik aalajangerneqartussat imaluunniit Naalakkersuisuugallartunit akuerisassaanngivissut, pillugit ataatsimeeqateqartarnerat.
Taakkua allapput: "Siullermik; inuit Inatsisartunut qinigaanngitsuit ataatsimeeqataatsinneqartarnerat isornartutut isigaarput. Partiip arlaata siulittaasua Inatsisartunut ilaasortaasimanngippat gruppip siulittaasua allaluunniit ataatsimiigiaqquneqartariaqaraluarpoq. Inuit Ataqatigiinniit partiit siulittaasui pingasut Inatsisartunut ilaasortaanngitsut ajorinngilluinnarpagut. Kisianni inuit taakku Inatsisartunut qinigaasimanngillat. Taamaalillunilu apeqquterpassuarnik akissutissarsineqanngisatsinnik qaffakaasoqarpoq. Nipangiussisimasussaatitaanermut tunnagsut qanoq pineqassappat? Tamanna unioqqutinneqassagaluarpat taava malittarisassat suuppat? Aalajangiinernut tunngatillugu akisuussaatitaasinnaaneq qanoq ippa? Inatsisartoqarneq sumut atussava, Naalakkersuisut piumasaannarminnik ”siunnersuisoqatigiinnik” pilersitsisinnaappata? Inuit Ataqatigiit piumasaraat Naalakkersuisut pissutsit tukattut ingerlaannartumik aaqqiivigissagaat aammalu demokrati tunngavigalugu aaqqissuussaanerput ataqqissagaat, Siumup siulittaasortaannginnerani IA-rmiut taakkua marluk allapput.
"Naalakkersuisut ulluni makkunani aalajangersaaniaqattaarpasipput inatsisitigut tunngavissaqaratik. Taamaalillutik partiit siulittaasui ataatsimiiaqqusaasaqattaarput akisussaaqataatinneqarniarlutik.
Inuit Ataqatigiit piumasaraat Naalakkersuisut partiit qanoq inissisimatinniarneqarnersut nassuiaqqaassagaat suliassanut puingaarutilinnut tunngasunik ataatsimiigiaqqusitinnatik. Aamma Inuit Ataqatigiit piumasaraat Naalakkersuisuugallartutut qanoq iliorsinnaanerlutik paaseqqaassagaat.
Massakkutuut Naalakkersuisuugallartut ingerlannaasagunik demokrati naapertorlugu ingerlatseriaaseq innarlissavaat. Tamanna akuerisinnaanngilarput.
Siumup naalakkersuisooqatigiit uppereersimanerat paasisariaqalerpaa. Qanqorluunniit kipiluttunartigigaluarpat Naalakkersuisuugallartut pisinnaatitaanngillat pingaarutilinnik nutaanik aalajangersaanissamut. Tamatta inatsisinut naalattussatitaavugut", Sara Olsvig Naaja Nathanielsenilu allakkatigut ammasutigut erseqqissaapput.