Tulleriiaarisarnermut ataatsimiititaliaq aalajangiussisimasoq: Kræfteqartoq katsorsarneqassanngilaq
Tulleriiaarisarnermut ataatsimiititaliami silittaasup Berit Bjerre Handbergip, kræfteqartup Naja Zeeb Pedersenip misiligummik katsorsarneqarnissaanut itigartitsisimaneq aalajangiussimavaa.
- Aningaasat nukiillu sumut atorneqassanersut aalajangiisariaqarpugut.
Taamatut oqarpoq Kalaallit Nunaanni Peqqinnissaqarfimmi nakorsaaneq aamma tulleriiaarisarnermut ataatsimiititaliami siulittaasoq, taassuma kræfteqartup Naja Zeeb Pedersenip Københavnimi misiligummik katsorsarneqarnissamut neqeroorfigineqannginnissaanik aalajangiisimaneq aalajangiussimavaa.
Taassuma nassuiaatigaa, Danmarkimut sanilliullugu Kalaallit Nunaanni peqqinnissaqarfimmi innuttaasumut ataatsimut aningaasanik ikinnerungaatsiartunik atuisoqartartoq.
- Aningaasat nukiillu katsorsaatinut amerlanerpaanut sunniuteqartuusutut nalunngisatsinnut atorusunneruvagut. Aamma misiligummik katsorsaasarnerup iluaqutaasarnera iluaqutaasannginneraluuunniit ilisimaneqanngimmat, tamanna tunngaviatigut salliutittanngilarput. pineqartulli (Naja Zeeb Pedersernip) alianartumik nappaateqarnera juusaarutigilluinnarparput.
Tulleriiaarisarnermut ataatsimiititaliamit katsorsarneqarnissaanik itigartitsisimaneq qanoq misinnarpa?
- Nakorsat (Rigshospitalimi nakorsat) katsorsaatit iluaqutaanersut iluaqutaannginnersulluunniit ilisimanagit misileraanissamut periarfissaqarput. Taakku pineqartoq misiligummik katsorsarsinnaavaat, immaqa suli ajornerulissutigisinnaasaanik.
Imaassinnaavormi aamma pitsaanerulissutigigaa?
- Aap – piffissami sivikitsumi imaassinnaavoq pitsaanerulissutigigaa. Isumaqarpungali amerlanerpaanut, tassa inuppassuit nappaatigisaannut iluaqutaasartunik iliuuseqarnissamut aningaasassaqannginneq nukissaqannginnerlu suli ajornerusoq:
- Tarnikkut nappaatillit kissaatigisatsitut isumagisinnaanngissavut. Inuppassuit ullut tamaasa piffissami sivisuumi seeqqumikkut siffissamikkullu arlaatigut iliuuseqarsinnaanittat tungaanut anniartaqaat. Tarrarsuinermi atortuvut pisoqalisimaqaat.
Politikkikkut ikiorserneqarneq pitsaasuusoq
Kalaallit Nunaanni nakorsat immikkut ilinniagaqarsimasutut aalajangersimasumik atorfillit amerlanersaat tulleriiaarisarnermut ataatsimiititalipa ataatsimiinneranut peqataasarput, tassanilu suliat ataatsimoorlutik oqaluuserisarlugit. Tulleriiaarisarnermut ataatsimiititaliami siulittaasup erseqqissaassutigaa, oqimaatsunik ilungersunartunillu nalinginnaasumik aalajangiisoqartartoq. Akerlianik oqaatigisinnaannginnerarpaa, taamatut aalajangiissuteqarnissamut kikkut pisariaqartinneqartutut suliatigut taamatut ilisimasaqartuunersut.
Anna Wangenheimip (D) qanittukkut Sermitsiaq.AG-mut oqaatigaa, politikikkut naatsorsuutit tulleriiaarisarnerillu ersarinngitsillugit, sulisut inuit ataasiakkaat katsorsarneqarnerannut aalajangiisuusarnissaat ileqqorissaarnikkut nalorninartoqartillugu.
Politikerit inuttut aningaasaqarnikkullu peqqinnissaqarfiup pigisaanut sinaakkutinut tunngatillugu innuttaasut naatsorsuutaannut pisarialimmik akisussaaffeqarnerisigut, sulisut aalajangiinerminni illersorneqarnissamik pisariaqartitsisut taassuma nalilersimavaa.
- Soorunami politikkerit innuttaasut naatsorsuutaannut ikiuunnissaat perusupparput. Peqqinnissaqarfimmi sulisut aningaasaqarnerlu eqqarsaatigalugit periarfissat pisinnaasallu killeqarneri paasineqarnerusuuppata nuannissangaluarpoq, Berit Bjeree Handberg oqarpoq.