Tunillatsissimasut arfinillit Ilulissani paasineqartut
Sapaatiummat inuit arfinillit covid-19-imik tunillatsissimasut Ilulissani paasineqarpoq. Danmarkimit tikittut misissorteqqinneranni tunillatsissimasut paasineqarsimavoq. Tunillatsissimasut tamarmik mattusimasussaanermut malittarisassat malissimavaat, taamaammat nunatsinni nakorsaaneq isumaqarpoq, tuniluuttoqalersinnaanera ilimanarpallaanngitsoq.
Ilulissani inuit arfinnilllit sapaammi decembarip 20-ani Covid-19-imik tunillatsissimasut paasineqarpoq. Taakku tamarmik nunamut tikinnerminnit ullut tallimassaanni misissortinnerminni tunillatsissimasut paasineqarlutik, Coronamut tunngatillugu allattoqarfik ilisimatitsivoq.
Inuit pineqartut decembarip 15-iani 16-ianilu Danmarkimit tikissimapput.
Ilaqutariit ataatsit pingasunik inuttallit tunillatsissimapput. Taakkunannga marluk Ilulissanut tikissimapput. Angalaqatigiillutik tikittut allat marluk aamma tunillatsissimapput. Taakku arfernat inummik allamik angalaqateqarluni tikissimavoq, kisiannili tikeqataa ullumi misissortinnermini tunillatsissimanngitsoq paasineqarpoq. Inuit pineqartut ilisimatinneqareerput mattunneqarlutillu, coronamut atatillugu allattoqarfimmit oqaatigineqarpoq.
Nunatta Nakorsaanerata Henrik L. Hansenip Sermitsiaq.AG-mut ilisimatitsissutigaa tunillatsittoqarsimanissaanik naatsorsuuteqarsimallutik.
- Tamanna tupaallaatigivallaanngilara. Nalunngeerparpummi Danmarkimi tuniluuttoqarnera pissutigalugu juullip nalaani tuniluuttoqalersinnaasoq. Angalaqatigiissimasulli assigiinngitsut pingasut tunillatsissimanerat naatsorsuutigisatsinnit amerlanerupput, nunatsinni nakorsaaneq oqarpoq.
Tamarmik sukumiisumik misissuiffigineqarsimasut
Taassuma kaammattuutigaa, pisortat pisumik tamakkiisumik paasisaqarnissaasa tungaanut Ilulissani innuttaasut tamarmik eqqissisimaniassasut.
- Sapaatip akunnerani kingullermi pisuni arlalinni inuit attaveqaqatigiittarfiisigut tusatsiakkanik siammarterisoqarsimavoq, taamaammat tamanut kaammattuutigaarput pisortat paasissutissaataannik misissuisarnissaq, taamalu tusatsiakkannik siammarterinaveersaartoqassalluni, oqatussat erseqqissaatigaat.
Timmisartut Ilulissat avannaata tungaanukartussat tamarmik siusinnerpaamik ataasinngornermi ullaakkut qulinut aallassapput.
Suliat pingasuusut tamarmik politiinit, peqqinnissaqarfimmit nakorsaaneqarfimmiillu misissuiffigeqqissaarneqarput. Paasissutissat pigineqartut malillugit taakku tamarmik angerlarsimaannartussaanermut maleruaqqusanik malinnissimapput. Tunillatsissimasunut qanigisaasut kinaassusersineqarsimapput. Nunatsinni nakorsaaneq taamaammaat isumaqarpoq Ilulissani tuniluuttoqarnissaanut ulorianartorsiorneq killeqartorujussuusoq.
Allanut attaveqartarneq killilerneqarli
- Pissutsit malinnaaffigeqqissaarneqarput, taamaattumillu annertunerusumik ilisimasaqalernissatta tungaanut Ilulissani innuttaasut allanut, pingaartumillu inunnut, Covid-19-imik tunillatsinnerminni napparsimarujussualersinnaasunut attaveqarnerminnik killilersuisaapput.
Ilulissani innuttaasut tunillatsissimanerminnik ersiutillit Ilulissani peqqinnissaqarfimmut oqarasuaatikkut attaveqaqqullugit kajumissaarneqarput. Innuttaasut ersiuteqanngitsut, aammalu misissortinnissamik oqartussaasuniit qinnuigineqarsimanngitsut Covid-19-imut misissorneqassanngillat.
- Peqqiinnissaqarfimmi isumalluutit inunnik eqqortunik misissuinissamut atorneqarnissaat pingaaruteqartorujussuuvoq. Inuit ataatsimoortut allat misissortissappata, oqartussaasut tamanna pillugu nalunaaruteqarumaarput, nunatsinni nakorsaaneq erseqqissaavoq.