Tunillatsissimasut nutaat 78-it pingasunngornermi paasineqartut
Aasianni ataaseq, Sisimiuni pingasut, Nuummi 73-it Qaqortumilu ataaseq tunillatsissimasut paasineqarsimavoq, Nunatsinni Nakorsaaneqarfimmit ilisimatitsissutigineqarpoq.
Ullormi kingullermi tunillatsissimasut nutaat 78-iupput, taakkunannga amerlanersaasut Nuummi paasineqarsimallutik.
Sisimasa suli uninngapput. Kisitsisinili takuneqarsinnaavoq, ataaseq angerlartinneqarsimasoq ataaserlu alla unitsinneqarsimasoq. Napparsimasoq ataaseq Nuummi suliarisassanngorlugu aallartinneqarsimavoq, Nunatsinni Nakorsaaneqarfik ullormi kisitsisinik nutarteriffiusumi ilisimatitsivoq.
Misissortissimasut akornanni tunillatsissimasut amerlassuaat decembarip 26-anili 7.4 procentiusimavoq, tunillatsissimasullu agguaqatigiissillugit 29-nik ukioqarlutik.
- Tunillatsissimasut 16%-ii 18-29-nik ukioqarput.
- Tunillatsissimasut 32%-ii 30-49-nik ukioqarput.
- Sinneruttullu 18%-iusut 50-iniit qummut ukioqarlutik.
- Misissortissimasut ukiuisa agguaqatigiissinneqarnerat tunillatsissimasut ukiuisa agguaqatigiissinneqarnerattut iinnangajappoq. Eqimattalli marluk allaanerussuteqalaarput. Misissortissimasut 28%-ii inuusuttuupput 18-it inorlugit ukiullit, taamalu tunillatsissimasut agguaqatigiissinneqarnerannit amerlanerulaarlutik. Eqimattat aappaanni 50-ileereersimasut pineqarput. Taakku 23%-ii misissortissimasuullutik, Nunatsinni Nakorsaaneqarfik allappoq.
Marlunngornermi tunillatsissimasut nutaat 74-iupput, nunatsinnilu nakorsaanerup Henrik L. Hansenip tassunga atatillugu oqaatigaa, tunillatsissimasut amerlassusaasa takutikkaat, Omikroni Kalaallit Nunaannut anngussimasoq.
Allannguut taanna tuniluutianeruvoq, taamaammallu oqartussat periusertik allanngortissimavaat, nunatsinni nakorsaaneq naapertorlugu tuniluuttoqarnera unitsinneqarsinnaajunnaarsimammat.
