Tunillatsissimasut - sisamanngornermi 28-t nutaat
Qasigiannguani tunillatsissimasut aqqaneq-marluk paasineqarput, Nuummi 15-it paasineqartut. Nuussuarmi tunillatsittoq ataaseq Upernaviup peqqissaavianut aallarunneqarsimavoq.
Tunillatsissimasut nutaat 28-t ullup ataatsip ingerlanerani paasineqarput. Taakku tamarmik PCR atorlugu misissuinermit paasineqarput.
Nuna tamakkerlugu PCR atorlugu misissugassat 1.400 ullup ataatsip ingerlanerani misissorneqarsimapput.
Nunatta nakorsaaneqarfia ilisimatitsivoq Qasigiannguani tunillatsissimasut aqqaneq-marluk paasineqarsimasut, Nuummilu 15-it. Ippassaq unnukkut nalunaarutigineqartutut Upernaviup eqqaani Nuussuarmi tunillatsissimasoq ataaseq aamma paasineqarpoq. Taanna Upernaviup peqqissaaviani maanna uninngavoq, pitsanngoriartorlunili.
Nuussuarmi tunillatsissimasumik paasisaqartoqarnerata kingorna najukkami tunillatsissimasinnaasunik ujartuineq aallartinneqareerpoq. Nunaqarfinnilu innuttaasut tunillatsissimanermut ersiuteqarunik peqqinnissaqarfimmut coronahotlinemulluunniit 80 11 00-mut saaffiginneqquneqarput, misissuinissamut pisariaqartitsisut qanoq amerlatiginersut oqartussanit paasineqarniassammata nalilersorneqarlutillu.
