Tunillatsittut nutaat 124-it - 82-it Upernavimmiipput
Tallimanngorneq 26. november tunillatsissimasunik nutaanik nalunaartoqareerneranit maannamut tunillatsissimasut nutaat 124-t, kommunini pingasuneersut, paasineqarsimapput.
Tallimanngorneq 26. novemberimiit maannamut tunillatsissimasut nutaat paasineqartut 124-iupput. Taakku kommunini pingasuneersuupput.
Tunillatsissimasut pingajorarterutai, tassa 82-it, Upernavimmiipput. Upernavimmi maanna tunillatsissimasut 150-it missaanniilerput. Illoqarfimmi annertuumik tunillaassuuttoqartoq paasineqareerpoq. Tunillatsissimasut maanna nalunaarutigineqartut sisamanngornermi aamma tallimanngornermi misissortissimasuupput.
Upernavimmi killilersuutinik Naalakkersuisut atuutsitsilereerput, ilaatigut silami, illut iluini angerlarsimaffinnilu amerlanerpaamik inuit 20-iusarnissaanik killiliisoqarluni. Taamatullu oqartussanit akuerineqarsimasut kisimik ullumikkumiit angalasinnaalertinneqarlutik. Tuniluunnerup siaruaatinnginnissaanut taama killilersuilertoqarpoq.
Illoqarfiit pingaarnersaanni tunillatsittut arlallit
Nuummi tunillatsissimasut nutaat 33-t paasineqarput, maannalu tunillatsissimasut katillugit 131-iulerput.
Taakku saniatigut Ilulissani tallimat aamma Qasigiannguani sisamat paasineqarsimapput.
- Qasigiannguani tunillatsissimasut sisamat paasineqarsimapput. Taakku sumi tunillatsissimanersut paasiniarlugu corona pillugu allattoqarfik maanna paasiniaaleruttorpoq, nunatta nakorsaaneqarfia ilisimatitsivoq.
Nunatsinni kommunini tallimaasuni sisamat maanna tunillatsissimasoqarput, tunillatsissimasullu katillugit 300-llutik. Upernavimmi ataatsimik napparsimmavimmi uninngasoqarpoq.