Tuniluunneq annertusiartorpoq - 13-it napparsimmavimmi uninngapput
Nunatsinni coronavirusip tuniluunnera suli annertusiartortutut nalilerneqarpoq. Utoqqaat illuini, atuarfinni suliffeqarfinnilu tunillatsissimallutik nalunaarsimasut suli amerlapput. 13-it napparsimmavimmi uninngapput. Meeqqat tunillatsereernerup kingorna kingunerluuteqartut marluk maanna uninngavimmiit angerlartinneqarsimapput.
PCR atorlugu misissuinerit affaat sinnerlugit suli Covid-19-imik tunillatsissimanermik takussutissaqartarput. Ullup ataatsip ingerlanerani misissukkat 192-iusuni 54 procentii tunillatsissimasut paasineqarpoq.
Nunatta Nakorsaaneqarfiata nunatsinni tuniluunneq pillugu ullormut nalunaarusiornermini tunillatsissimasut qassiunerinik ullumi ilisimatitsinngilaq. Nakorsaaneqarfiup nassuiaatigaa qassit tunillatsissimanersut aallaavigineqartassanngitsut nunatsinni tuniluunnerup ineriartornera pillugu nassuiaasiornermi.
- PCR atorlugu misissortissinnaasunut malittarisassat allanngorsimammata - nunalu tamakkerlugu PCR atorlugu misissortittartut ikiliartormata, nunatsinni tunillaassuunnerup ineriartornera PCR atorlugu misissuinerni takuneqarsinnaanngilaq. Taamaammat nunap immikkoortuini illoqarfinnilu qassit tunillatsissimanerinut nalunaarsukkat maannamit nalunaarutigineqartassanngillat, nunatta nakorsaaneqarfia allappoq.
Napparsimmavimmi uninngasut amerlassusaat apeqqutaanerulerput
Nakorsaaneqarfiup nassuiaatigaa Covid-19-ip tuniluunnerata inuiaqatigiinnut sunniutai aammalu napparsimmavimmi uninngasut amerlassusaat ineriartornermut naatsorsuutigissallugit pissusissamisoornerusoq.
- Ullumi nalunaaqutaq 14.00 uninngasut aqqanilinniit 13-inut amerleriarsimapput. Nuummi arfineq-marluk, Qaqortumi marluk, Ilulissani ataaseq, Sisimiuni ataaseq, Uummannami ataaseq aamma Paamiuni ataaseq, nakorsaaneqarfik allappoq.
Uninngasuni pingasut Covid-19 pissutigalugu uninngapput. Uninngasut sisamat allamik peqquteqarlutik uninngapput, Covid-19-imilli tunillatsissimanertik pissutigalugu nappaataat ajornerulersinnaalluni. Uninngasut arfinillit alla pissutigalugu uninngapput, Covid-19-imillu tunillatsissimaneq uninnganerannut pissutaanani.
Nakorsaaneqarfiup ilanngullugu ilisimatitsissutigaa meeqqat Covid-19-imik tunillatsissimanerup kingorna kingunerluuteqartutut ilimagisat maanna uninngavimmit angerlarsinnaalersimasut.