Tunisassiorfiup matuneqalernera akerleraat
Royal Greenlandip Qeqertarsuatsiaani tunisassiorfimmik februarimi matusiniarnera Siumup immikkoortortaqarfiata Nuummiittup akerleraa.
Royal Greenland-ip Qeqertarsuatsiaani tunisassiorfik pilersaarut malillugu februarip ulluisa aqqaneq-aappaanni matuniarpaa. Siumup immikkoortortaqarfiata Nuummiittup tunisassiorfimmik matusiniarneq akerleraa.
– Siumut Nuup taama innuttaasut kipiluttunartorsiorluinnarlutik inissisimalernissaat akuerisiinnaanngilluinnarpaa. Tunisassiorfik matuneqassappat aammalu matusereernerup kingorna qanoq iliuuseqartoqassanersoq qulaajarneqartariaqarpoq, Siumup Nuummi immikkoortortaqarfiani siulittaasoq Kim Godtfredsen tusagassiutinut taama allappoq.
Siumut isumaqarpoq, Qeqertarsuatsiaani innuttaasut Royal Greenlandip tunisassiorfianik piginneqatigiiffinngortitsillutik tigusisinnaanersut misissornertariaqartoq. Taassuma saniatigut Siumup Nuummi immikkoortortaqarfiata paaserusuppaa tunisassiorfimmi sulisut suliffitsik 12. februar-imi matuppat ajunngitsorsitinneqassanersut ilinniaqqinnissaminnillu neqeroorfigitissanersut.
– Kommuneqarfik Sermersooq, borgmesteri Asii Chemnitz Narup (IA) aamma aalisarnermut naalakkersuisoq Finn Karlsen (A) tuaviortumik aaqqissuutissanik siunnerfilimmik innuttaasunut suliniuteqaqqullugit piumaffigaagut, Siumup Nuummi immikkoortortaqarfia tusagassiutinut nalunaarummi allappoq.