Tunisisartunik nalunaarsuiffik Ninimut naleqquttumik qimerluuisoq
-Iluatsissaqqaarnera upperaarput. Kisianni neriuummik attassiniarneq ajornakusooqaaq, inuusuttup aammigut kræfteqartup Nini Tessingip arnaa, Sara Tessing, oqarpoq
22-nik ukiullip Nini Tessingip aammigut kræftimut akioruminaatsumut sisamassaalu aqunneqarsinnaajunnaarluni aavata kisitsisaanik appartitsisumut kemorteqqileruttornerani neriuutissaqartoqalaalerpoq.
Taama Ninip arnaa, Sara Tessing, Sermitsiaq.AG-mut oqaluttuarpoq.
- Nakorsanit ilisimatitsissutigineqarpoq nunarsuaq tamakkerlugu paternik tunisisartunik nalunaarsuiffimmi Bone Marrow Donors Worldwidemi naleqquttumik nassaarsimagunarlutik. Stamcellinik qalatsimeersunik amerlisaasoqarniarpoq, tamannalu maannamut nutaarsiassaavoq isumalluarnartorujussuaq. Stamcellit taakkua naleqquttuunersut sapaatip-akunneri sisamat arfinillillu akornanni ingerlareerpata paasiumaarparput, Sara Tessing oqarpoq.
Nini Tessing taamaalilluni tunisisumit cellinik aappassaa tigusaqassaaq. Siullermik 2011-mi aqqalussaminit tunineqarpoq. Tamanna kræftip uteqqinnissaata tungaanut qaammatini arfineq-pingasuni isumalluarnartumik ingerlavoq, katsorsarneqarnera ajunngitsumik ingerlammat.
Læs "Sådan bliver du knoglemarvsdonor"
Qujamasuttorujussuusoq
Sara Tessing oqaluttuarpoq, nassaarineqartoq naleqquttuusorineqartoq kalaallinit qallunaanillu pisuunngitsoq.
- Tamanna apeqqutaavallaarsimanngilaq, kisianni kalaallinut patermik tunisisartutut nalunaarnissamik kaammattuutima sunniuteqarluarsimanera qujamasuutigisorujussuuara. Nuannaarutigeqaara. Inunnit kalaaliusunit qallunaajusunillu marlunnit saaffigineqarpunga, taakkuali ajoraluartumik atorsinnaasimanatik, Sara Tessing oqarpoq.
Nini Tessingip kemortinnera ima sakkortutigaaq, kræftip celliisa toqorarneqarnerisa saniatigut patermik aamma uumassuseerutitsisarluni. Taamaattumik tunisisumit stamcellinik patermut iluaqutaasinnaasumik pissarsinissaa pingaarutilerujussuuvoq.
Tapersersorneqarnermut qujasoq
- Tatitussuseqalersitsisoq tassaavoq suut tamarmik iluatsikkumaarnerannik neriuut. Nini peqqiilliortorujussuuvoq. Amerluuteqalersimavoq tamatumalu peqatigisaanik akiuussutissaata apparluinnarneranik kinguneqartumik sakkortuumik kemortilluni. Kisianni eqqumaffiginninneq tapersersuinerlu ersersinneqartut soorunami qujassutigerusuppakka. Tamanna maanna pisumut pingaarutilerujussuuvoq, Sara Tessing oqarpoq.
Nini Tessing pillugu Sermitsiaq.AG-mi allaaserisat tamaasa uani atuakkit