Tunngaviusumik inatsisissamut missingiut: Naalakkersuisut pilersaarutaat ataatsimiititaliap taperserpaa
Tunngaviusumik inatsisissamut missingiutip suliarineqarnerata ingerlariaqqinnissaanut Naalakkersuisut pilersaarummik suliarinnissasut, Inatsisinut Ataatsimiititaliap taperserpaa.
Siumut aamma IA ukiaanerani ataatsimiinnermi tunngaviusumik inatsisissatut missingiutip upernaaq saqqummiunneqartup, suliarineqarnerata ingerlariaqqinnissaata qulakkeerneqarnissaa pillugu siunnersuuteqarput.
Siunnersuutit taakku marluk ataatsikkut 12. oktober suliarineqarput, ilaatigullu tunngaviusumik inatsisissamik sulinerup nanginneqarnerani innuttaasut qanoq peqataatinneqarnissaannut tunngapput.
Inatsisartuni suliarineqarneranut atatillugu Naalakkersuisut allannguutissatut siunnersuummik saqqummiussaqarput, taanna naaperiaaneruvoq.
Naalakkersuisut ”Kalaallit Nunaannut tunngaviusumik inatsisissatut missingiut pillugu qanoq ililluni siamasissumik oqallittoqarnissaanut” pilersaarusiussasut siunnersuutigineqarpoq.
Ataatsimiititaliaq tapersiivoq
Pilersaarut kingusinnerpaamik upernaakkut 2024-mi Inatsisartuni Inatsisinut Ataatsimiititaliamut saqqummiunneqassaaq.
Inatsisinut Ataatsimiititaliaq Inatsisartunut innersuussutiginnippoq. Ataatsimiititaliarlu isumaqatigiittoq IA-mit, Siumumit aamma Naleqqamit sinniisuutitaqartoq, Naalakkersuisut siunnersuutaannik akuersinissamut inassuteqarpoq.
Taamaalilluni pilersaarut malillugu ullumikkut marlunngornermi kingusinnerusukkut suliarineqalerpat, Inatsisartut taamatut taasinissaat ilimanarluinnarpoq.
12. oktobarimi siullermeerinninnermi partiit illuatungiliuttut Atassut aamma Demokraatit tunngaviusumik inatsisissatut missingiummut aningaasanik amerlanerusunik atuisoqarnissaanut akerliupput.
Partiit illuatungiliuttut akerliusut
Kalaallit Nunaat naalagaaffinngornissamut aatsaat qanillippat tunngaviusumik inatsimmik pisariaqartitsisoqassasoq, taamaattumillu maanna missingiut naammattoq, ilaatigut Demokraatineersoq Nivi Olsen oqarpoq.
- Maniitsumi atuarfimmi meeqqat ilinniartitsisullu oqulimmiipput. Assersuutigalugu taakkunannga 30 mio. kr.-nik atuarfik iluarsaassinnaagaluarparput, Nivi Olsen, Inatsit Tunngaviusussaq pillugu Isumalioqatigiissitani 30 mio. kr.-t missaanniittut atorneqarnerinut innersuussilluni oqallinnermi oqarpoq.
Nutartigaq: Naalakkersuisut allannguutissatut siunnersuutaat marlunngornermi ulloqeqqaanerani sivikitsumik oqallittoqarnerata kingorna akuerineqarpoq.