Tunngaviusumik inatsisissaq pillugu isumalioqatigiissitaq: Suli suliassat allattorsimanngillat
Tunngaviusumik inatsisissaq pillugu isumalioqatigiissitaq sulerissanersoq, kikkunnik ilaasortaqassanersoqimaluunniit qanoq akissarsiaqartigissanersut suli isumaqatigiissutigineqanngilaq.
Tunngaviusumik inatsisissaq pillugu isumalioqatigiissitaq 2016-imi akuerineqalermat, piaarnerpaamik suliarineqarpoq – weekendip ingerlanerani aalajangerneq Inatsisartuni tuaviuullugu suliarineqarpoq. Kisianni sulineq maanna uninngavoq – ukioq ataaserlu sinnerlugu uninnganikuulluni.
AG taama allaaserisaqarpoq.
2016-imi aalajangiisoqarnerata kingorna ukiup affaa ingerlareersoq isumalioqatigiissitaq aatsaat pilersinneqarpoq.
2017-ip naalernerani sulineq unittuuippoq, taamani isumalioqatigiissitami siulittaasup, Vivian Motzfeldtip (S) aamma naalakkersuisuni akisussaasup Suka K. Frederiksenip (S) isumalioqatigiissitami kikkut ilaasortaasinnaanerat isumaqatigiissutigimmassuk. Qinersisoqarnissaanik aalangiineq sioqqullugu sulineq iluamik aallartinngilaq.
Inatsisartunut ilaasortat kisimik isumalioqatigiissitami ilaasortaasannginnissaat, maajimi naalakkersuisoqatigiit pilersinneqarneranni isumaqatigiissutigineqarpoq. Ilisimaneqareersutut taakku naalakkersuisoqatigiit sivisunngitsumikm atapput, taamaammat ikinnerussuteqarlutik naalakkersuisoqatigiit septembarimi pilersinneqarmata isumalioqatigiissitami nutaami sulineq aallartivissinnaanngorpoq. Naalakkersuisut maanna Demokraatinit tapertaqalerput, taakku tunngaviusumik inatsisissaq pillugu isumalioqatigiissitaq isornartorsiortuarnikuuaat.
Tunngaviusumik inatsisissaq pillugu isumalioqatigiissitamut tunngatillugu Naalakkersuisut ukiaq missingiummik tusarniaassummik Inatsisartut ataatsimiititaliaannut nassiussipput.
Ataatsimiititamiami siulittaasup, Anders Olsenip (S) oqarnera naapertorlugu, akissummik suli utaqqisaqarput.
- Suli naammassinngilagut, suli ataasiakkaanik apeqqutissaqarpoq itisiliisummik akissutisiffigisassatsinnik, Anders Olsen oqarpoq, nassuiarlugulu ilaatigut ilaasortassanik katiterinissaq akissarsiaqarnissamullu apeqqutit pineqartut.
2016-imi ukiakkut aalajangiinermi allaqqavoq, isumalioqatigiissitaq tunngaviusumik inatsisissamut missingiummik ukiut marluk pingasulluunniit ingerlanerini saqqummiussissasoq.
Tunngaviusumik inatsisissaq pillugu isumalioqatigiissitap killiffia pillugu AG-mi paasisaqarnerusinnaavutit, taanna uani ataani isissutissarsiffifisinnaavat: