Tunnulik Vejlemut uteqqippoq
Tunnulik 2010-mi ukiassakkut Vejle Fjordimut toqujartorluni pulasoq maanna Vejle Kunstmuseumimi saqqummersinneqarpoq.
Tunnulik, taamani Danmarkimi sammineqartorujussuaq, maanna Vejlemut uteqqippoq tassani saarnga 17 meterinik takissusilik saqqummersinneqarluni. Tunnullip saarnga immikkut saqqummersitsinermi takuneqarsinnaavoq. Saqqummersitsineq soqutiginnittunut tamanut ammavoq arfininngornermi januaarip 15-ianni nal. 11-miit juunip 5-iannut 2011.
Tunnullip saarngata saniatigut tunnullip Vejle Fjordimi toqujartornerata filmiliarineqarnera takutinneqartassaaq. Tamatuma saniatigut takuniaasut arfernik Vejle Fjordimilu arfernik paasissutissinneqassapput allagartarsuarnik paasissutissiissutinik arlalinnik digitalimillu skærmersuarmik.
Saqqummersitsineq ammarnersiorneqassaaq januaarip 14-ianni nal. 10, tasani Vejle Kommunemi borgmesterip inersimasunut meeqqanullu qaaqqusanut saqqummersitsineq ammassallugu.
Saqqummersitsinermik suleqatigiillutik suliarinnittuupput Københavnimi Statens Naturhistoriske Museum, Vejemi Økolariet aamma Vejle Kunstmuseum.
Tunnulik Vejle Fjordimi toqummalli Statens Naturhistoriske Museumip tunnullip saarngi containerersuarni nagguaatsut anaannik, Københavnimi Zoologisk Have-mit pissarsianik, salippai.
Statens Naturhistoriske Museum siullermiinngilaq arferit saarnginik saliilluni, tunnulilli Vejlemeersoq nutaanik unammilligassaqarsimavoq. Arfeq Vejleneersup utoqqaassusisa pissutigalugu saarngisa passunneri, Vejlemilu saqqummersinnissaanut assartornissaa immikkut ajornakusoorsimapput.
Vejle Fjord arfernik angisuunik mikisunillu immikkut ittumik kajungerineqartarsimavoq. imaata itissusia imaatalu pitsaassusia pissutigalugu arfinerit kajungerineraat qularnaavillugu ilisimaneqanngilaq, Vejle Kunstmuseum allappoq, uumasunilli iilsimatuut tupigusuutigaat arferit assigiinngitsut amerlasoorsuit ukiuni kingullerni 100-ni kangerlummuliartarsimanerat. Miluumasut angisuut tamakkua ilarpassui qujanartumik kangerlummit aneqqittarput, ilaalli Vejle Fjordimi toqusarlutik.