Tunumi nannut maanna kisinneqarput
Ukiorpassuarni Pinngortitaleriffik piareersareerluni Tunumi nannunik kisitsineq annertooq aallartippaa. Inernerit ilaatigut silap pissusiata sunniutaasa paasinissaannut tunngaviusut annertusissavaat.
Pinngortitaleriffik oqaluttuarisaanermi aatsaat pisumik suliaqarpoq.
Tassami siullermeerluni Tunumi nannunik kisitsisoqarpoq. Kisitsineq 22. marts aallaartinneqarpoq, pinngortitaleriffik tusagassiuutinut nalunaarummi ilisimatitsivoq.
Tunup kujataani avannarpasissuseq 64° missaanniittumiit Peary Landimut, tassa Kitaata avannaarsuata tungaanut nannut timmisartumik kisinneqartussaapput. Pinngortitaleriffiup ilisimasaa malillugu nunarujussuaq aatsaat taamak annertutigisoq timmisartumik kisitsiffiusussaavoq.
- Una kisitsineq ingerlanneqartoq ukiuni arlaqartuni pilersaarusiorlugulu piareersarsimavarput, Fernando Ugarte, Miluumasunut Timmissanullu Immikkoortortaqarfimmi pisortaq oqaluttuarpoq.
Ukiorpassuarni suliaq
Ukioq 2014 aamma 2015 apersuilluni misissuineq aallartinneqartoq taanna ilisimatitisvoq, ilaatigut piniartut apersorsimavagut sumiiffiit kisitsiffissat ukiullu qanoq ilinerani kisitsisoqarnissaa piukkunnarnerpaajussanersut paasiniarlutigit,
Tamatuma kingorna ornigulluta misissuinerit arfinillit aqqutigalugit nannut satellitsikkut attaveqaatilinnik nalunaaqutsersorsimavagut, qanoq siaruarsimatiginersut nikitsigisarnersullu paasisaqarfiginerorusukkatsigit.
Kisitsiffissaq nunarujussuuvoq, Tunullu kujataani ukiut 2015, 2016 aammalu 2017misissuisoqarpoq, taamatuttaarlu Tunup avannaani kisitsiffissaq tamakkerniarlutigu ukiut 2018, 2019 kiisalu 2022 misissuisoqarluni.
- Nualluussuaq covid-19 peqqutigalugu ukiuni marlunni kinguaattoorsimavugut, taamaattumik nannut qungasequserlugit nalunaaqutserneqartut kingulliit 2022-imi aatsaat nalunaaqutserneqarsimapput, naak 2020-imi nalunaaqutserneqarnissaat pilersaarutaasimagaluartoq, pisortaq nassuiaavoq.
Ullormit ullormut
Kisitseqataasussallu Nunatsinniit, Danmarkimiit, USAmiit, Norgemiit, Canadamiillu aggertartussaapput, tamarmillu timmisartumik kisitsinermik nannunullu tunngasutigut misilittagaqarluartuullutik. Kisitseqataasussat piniartunik Tasiilameersunik, Kulusummeersunik kiisalu Ittoqqortoormeerneersunik ilaqartussaapput, Pinngortitaleriffik ilisimatitsivoq.
Kisitsisussallu qasunnginniassammata holdinut pingasunut avinneqarnikuupput.
Kisitsinerit inerneri piujuartitsiniartumik piniartoqartarnissaa anguniarlugu siunnersuinissanut, inuillu ingerlattagaasa pilersaarusiorfiginissaannut minnerunngitsumillu silap allanngoriartornerata sunniutaanik paasinninnerulernissamut atorneqartussaapput.
Kisitsinerujussuaq danskit avatangiisinut aqutsisoqarfiannit Miljøstyrelsemit aammalu Tunup Avannaarsuani uuliasiorlutik misissuinissaminnut akuersissummik tunineqarsimagaluartunit aningaasartalerneqarpoq.