Tusagassiivik Sermitsiaq.AG 2023-mi sinneqartooruteqarluarnermik saqqummersitsivoq
Tusagassiivik Sermitsiaq.AG tusagassiornerup tungaatigut tatineqaraluarluni naammaginartumik sinneqartooruteqarpoq. Tusagassiivik 2023-mi pingasoriaammik sinneqartooruteqarpoq 1.500.000 koruuninik sinneqartoorluni.
![Tusagassiivik Sermitsiaq.AG 2023-mi 1.500.000 koruuninik sinneqartooruteqarpoq. Ukiumoortumik nalunaarusiaq tusagassiivimmit tamanut saqqummiunneqaqqammerpoq.](https://image.sermitsiaq.ag/1293189.webp?imageId=1293189&width=960&height=518&format=jpg)
Tusagassiivik Sermitsiaq.AG tusagassiornerup tungaatigut tatineqaraluarluni naammaginartumik sinneqartooruteqarpoq. Tusagassiivik 2023-mi pingasoriaammik sinneqartooruteqarpoq 1.500.000 koruuninik sinneqartoorluni. Tamanna ukiumoortumik nalunaarusiami pingasunngormat saqqummiunneqartumi erserpoq.
- Tusagassiivimmut 2023 ukioq ilungersunartuuvoq. Suliffeqarfik teknologiimik
suliffeqarfissuarnit ussassaaruterpassuarnik annaasaqarnermigut atuartartullu
ileqqulersuutaannit nutaanit tatineqarpoq. Tamatuma saniatigut tusagassiorfik allanik
aqutsisoqalerpoq, tamannalu tamatigut mianernartuulluni, piumasaqaatitaqarlunilu kisiannili
ingerlalluarluni.
- Pisortanngortup sulisuni pikkorissut peqatigalugit 2023-mi anguniakkaminik
angusaqarluarpoq, ukiunilu tulliuttuni neriulluarnartunik aallartitaqareerluni, siulersuisut
siulittaasuat Lars Vesterløkke oqarpoq.
Digitalimik naleqarnerulersitsinissaq
Pitsaasumik ineriartornerup atuisunut digitalimik naleqarnerulersitsinissamik
anguniagaqarnermi, Tusagassiorfik Sermitsiaq.AG-p digitalimik allannguinerup
ingerlateqqinnissaanut tunngavissilluarpaa. Atuisartunut digitalimik naleqarnerulersitsissalluni tusagassiiviup anguniaraa, tusagassiiviup Sermitsiaq.AG-p pisortaanera Masaana Egede oqarpoq.
- Tusagassiuutinik atuinerput allanngortuaannarpoq, atuisullu pisariaqartitaannut
malinnaanissarput pingaaruteqarpoq. Taamaattumillu digitalimik neqeroorutinik aamma
atuisutsinnut aaqqiissutinik nutaanik pilersitsiortuleruttorpugut. Teknologimut nutaamut
aamma silassorissuusiamut imarisanik pitsaanerulersitsisunik aamma nioqqutitsinnut
iseruminarnerulersitsisunut aningaasaliivugut.
- Piffissap sivikitsup ingerlanerani silassorissuusiamik nutserutitsinnik Nutserisoq.gl-imi
iluatsitsilluarpugut, tamannalu pisartagaqartutsinnut amerleriartitsingaatsiarpoq.
Digitalimik ineriartortitsinerput ingerlateqqissavarput, atuisutsinnullu iluaqutaassaaq, tusagassiiviup Sermitsiaq.AG-p pisortaanera Masaana Egede oqarpoq.
Jette Skifte Andersen siulersuisuni sulisunit qinikkatut taamaatippoq, taarsiullugu Linda Lyberth Rachlitz ilaasortanngorpoq. Siulersuisunut ilaasortat sinneri siulittaasoq Lars Vesterløkke, siulittaasup tullia Klaus Nygaard aamma Ulla Lynge allannguuteqaratik ingerlaqqipput.