Tusagassiorfik: Kommuneqarfik Sermersooq akiligassamik inerteqqutaasumik akiliisimasoq
Kommuneqarfik Sermersooq pisortap Danmarkimi napparsimmavimmi namminersortumi isimigut suliaritinneranut 22.000 koruuninik akiliisimavoq. Tamanna inerteqqutaasoq, inatsisilerinermi professori tusagassiorfimmut Den Uafhængigemut oqarpoq.
Kommuneqarfik Sermersup kommumini pisortap Danmarkimi isimigut suliaritinneranut akiligassaq 22.000 koruuniusoq akilersimavaa.
Pisortaq Tusagassiorfiup Den Uafhængigep podcaastianit Den Uundgåeligemit apersorneqarami nammineerluni tamanna oqaluttuaraa.
Tamannalu inerteqqutaasoq inatsisilerinermi professori Sten Bønsing tusagassiortimmut pineqartumut nassuiaavoq:
- Inuttut naammineq tamanna aningaasartuutissaammat. Kommuni pisortanut - pisortat aningaasartuutissaannut - tunngassuteqartunut taamaallaat akiliuteqarsinnaavoq. Matumanimi pineqartumi angutip nammineq inuttut isiminik suliariatittup akiligassarivaa, Sten Bønsing oqarpoq.
Sulisitsisoq nammineerluni aperisimasoq
Pisortap Gerth Jakobsenip Den Uafhængigemut nassuiaatigaa, nunami coronamut upalungaarsimasumiinnermini sulisitsisumi nammineerluni siunnersuutigisimagaa, suliaritinnera akilersinnaallugu, pisortaq nammineerluni Københavnimi napparsimmavimmi namminersortumi suliaritinnissaminut inniminniisimalluni:
- Oqaluttuuppakka aallartussaanerarlunga. Taamanikkullu namminneq oqarfigaannga suliaritinnera akilersinnaallugu, Gerth Jakobsen oqarpoq. Pisortap Den Uafhængigemut oqaatigerusussimanngilaa, suliaritikkiartorluni aallarnerminut atatillug timmisartumut ilaaneq akunnittarfimmiinnerlu kommunip aamma akilersimanerai.
Sermitsiaq.AG-mit isimik suliaritissimanermut allagartaq takuneqarsimavoq.
Pisoq kommunimi pisortaasimasup Lars Møller-Sørensenip kommunimilu pisortap tulliata Marie Fleischerip nalaani pisimasoq, utertitsinissamik isumaqatigiissut atsiorsimavaat. Maanna kommunimi pisortaasup Ole Jakobsenip tusagassiorfimmut oqaatigaa, naliliisimaneq tunngavigalugu aalajangiisoqarsimasoq, isumaqarnerlarporlug tamanna nalinginnaasumik ileqqorineqartanngitsoq:
- Nalinginnaasuugunanngilaq
- Tamanna nalinginnaasumik ileqquusorinngilara. Paasitinneqarsimavunga pisumi immikkut naliliisimaneq tunngavigeqarsimasoq, tassani qitiusumik sulisorisaq isigisaarutilersoq nalilerneqarsimalluni aamma suliaritinnissamut ukiup affaani utaqqisussaasimalluni, Ole Jakobsen Den Uafhængigemut oqarpoq.
Ole Jakobsenip isummerfigerusunngilaa, Gerth Jakobsenip suliaritinnissamut nammineerluni inniminneereersimanera aamma nammineerluni akiliuteqarniarluni oqaaseqarsimanera, sulisitsisuatalu akiliussinissamik siunnersuuteqarsimanera.
Kommunimi pisortap ilanngullugu oqaatigaa, aalajangiisimaneq "inerteqqutaanersoq" pillugu "paasisaqarsimanani", pisortallit atorfimminut uteqqipallassinnaanerata tunngavilersuutigineqarsimanera isumatusaarnerusutut isiginerarpaa.
Ole Jakobsenip ilanngullugu aamma oqaatigaa, assigiimmik pineqarnissamut tunngavik malillugu kommuni sulisuminut tamanut assigusumik iliuuseqarsinnaanersoq pillugu apeqqusiisimalluni.