Tusagassiorfik: Meeravissiaasimasut taarsiivigineqarnissamik utoqqatserfigineqarnissamillu aamma kissaateqarput
Inuit arfineq-marluk unioqqutitsilluni 1979 sioqqullugu Kalaallit Nunaannit meeravissianngortitsisimanermik suliani Danmarkip eqqartuussivimmut suliassanngortinnissaanut periarfissat misissorpaat.
Danskit naalagaaffiat Kalaallit Nunaani innuttaasunit eqqunngitsumik pineqarsimasunit eqqartuussivimmi sassartinneqaqqissinnaavoq.
Inuimmi arfineq-marluk Danmarkimit utoqqatserfigineqarnissaminnik taarsiivigineqarnissaminnillu kissaateqarput. Taakku taamanikkut inatsisitigut nalorninartumik tunngaveqarluni – inatsisit atorunnaareersut aamma malillugit nalorninartumik - qallunaanut aappariinnut meeravissianngortinneqarsimallutik isumaqarput.
KNR taama allaaserisaqarpoq.
Arfineq-marluusut ilagaat Margrete Johansen, taanna naalungiarsuulluni 1951-imi qallunaanut aappariinnut meeravissianngortinneqarpoq. Anaanani sakiallulluni toqusimasoq meeraanermini paasitinneqarsimavoq.
Anaanani Kalaallit Nunaanni nassaarigaa
Kisianni Margrete Johansenip 39-nik ukioqarluni anaanani Kalaallit Nunaanni nassaaraa, arnaalu meeravissianngortitsinissamut akuersissuteqarsimanngilaq, taanna KNR-imut oqaluttuarpoq.
Taakku eqqartuussissuserisoqarfik Ehmer Pramming illersuisoraat, suliarlu misissuleruttorpaat.
Ehmer Prammingip aamma inatsisitigut ataataqanngitsut, taarsiisoqarnissaanik siunertaqarlutik naalagaaffik pillugu suliassanngortitsisut ikiorpai.
Ministeriuneq Mette Frederiksen siornatigut meeqqanut misiligutaasimasunik taaneqartartunut, 1950-ikkunni Danmarkimut aallartinneqarsimasunut utoqqatsernikuuvoq. Tassanilu maanna suli inuusunut arfinilinnut 250.000 kr.-nik taarsiisoqarnikuuvoq.