Tusagassiorfik: Russit umiarsuaat ”isertortumik paasiniaasartoq” umiarsuarmik ilisimatusaammik Kalaallit Nunaata eqqaani alapernaarsuisoq
Russit umiarsuaataata akunnerni 18-ini norskit umiarsuaataannut ilisimatusarfiusumut navianartumik qanillilluni Kalaallit Nunaata Svalbardillu akornanni imartami angalaarsimavoq, DR taama allaaserisaqarpoq.
Umiarsuaq"Yantar", ilisimatuut oqarnerat naapertorlugu russit angallataanni isertortumik paasiniaasartoq, piffissami akunnerit 18-it ingerlaneranni arlaleriarluni norskit umiarsuaataat ilisimatusarfiusoq 'Kronprins Haakon' qanillingaatsiarlugu angalasimavoq, tamanna umiarsuup Kalaallit Nunaata Svalbardillu akornanni imartamiinnerani pivoq.
DR-ip pisoq allaaserisaa, tusagassiorfiup norskit tv-qarfiat NRK aqqutrigalugu nalunaarusiat Norsk Polarinstitutimeersut, umiarsuarmik ilisimatusarfimmik piginnittumit, aamma Norgemi Havforskningsinstituttetimit, umiarsuarmik atuisumik pissarsiarisimanerat pissutigalugu.
Tamanna septembarimi pivoq, inuttat aamma ilisimatusartut russit umiarsuaataanit pissusilersorneq ernumanartutut aamma peqqusaartutut misigisaqarfigaat.
- Uuttortaaniarluta unikkaangatta aamma unittarput. Angalaqqileraangattalu malinnaalertarput. Katillugit ulloq unnuarlu ataatsip missaani malippaatigut, Colin Stedmon, silap pissusiata allanngoriartorneranik immamut tunngasunik ilisimatusartoq, DR-imut taama oqaluttuarpoq.
'Yantar' aasaanerani 2016-imi Nuummi umiarsualiviup avataani kisarsimasimasoq, Issittumi Sakkutooqarfiup aamma siornatigut Altinget Arktisimut uppernarsarnikuuaa.