Tusagassiortunik katersortitsineq: Killilersuutinik atuiunnaarniannginnitsinnut pissuteqarpoq
Peqqinnissaqarfimmi sulisut 100-t coronap tuniluunnerujussuanit pissuteqartumik napparsimapput. Pissutsilli nalinginnaaleqqinnissaanut sapaatip-akunnerini tulliuttuni pissutsit qanoq issanersut apeqqutaavoq, nunatsinni nakorsaaneq oqarpoq.
- Pissutsit ataatsimut isigissagaanni, inissisimaffigerusutatsinnut pisimavugut. Suli tuniluuttoqaqaaq, peqqinnissaqarfilli suliassaqarfinnik ingerlatsisinnaagallarpoq, tassa upalungaarsimanissaq isumannaarneqarsimavoq aamma inuiaqatigiinni ingerlatat pingaarnerit ingerlanneqarsinnaapput, nunatsinni nakorsaaneq Henrik L. Hansen tallimanngornermi ullup-qeqqanut tusagassiortunik katersortitsinermi oqarpoq.
Naalakkersuisoq Pele Broberg (N) nunatsinni nakorsaaneq peqatiglugu tusagassiortunik katersortitsinermut peqataavoq, taakkulu marluullutik oqaluttuaraat, assersuutigalugu Danmarkimisulli coronamut atatillugu killilersuutinik atorunnaarsitsinissaq suli periarfissaanngitsoq.
- Nunap annersaani, tassa Qaanaammiit Nanortalik tikillugu tuniluuttoqangaatsiarpoq. Tasiilaq taassumalu eqqaani najugallit kisimik tuniluuffiunngillat, naatsorsuutigisariaqarparpulli Tunumi aamma tuniluuttoqalernissaa, tamanna ulluni qaninnermi pissanngippat ajussanngilaq.
Init pilattaaviusartut marluinnaasut
- Piffissaq aalajangersimasoq qaangiuppat pinngitsoorneqasinnaanngitsumik tuniluuttoqalernissaanut qulakkeerinnikkusuppugut, Henrik L. Hansen oqarpoq.
Nunatsinni nakorsaanerup oqaluttuaraa, peqqinnissaqarfimmi sulisut 100-t maannakkorpiaq napparsimasut. Ilaatigut tamatuma malitsigisaanik, Nuummiittumi Sanami init pilattaaviusartut marluinnaat atorneqarlutik
Nunatsinnili nakorsaanerup taamatut inissisimasoqarnerani suliassat eqqarsaatigalugit tamanna ajorpallaannginnerarpaa.
- Pilattaanissanut kinguartinneqarsinnaanngitsunut taamaallaat inissaqarpoq. Piffissallu sivisuallaanngitsup ingerlanerani pissutsit pitsaanerulingaatsiarnissaat nalunnginnatsigut, taamatut inissisimasoqarnerani suliassat eqqarsaatigalugit tamanna ajorapallaanngilaq.
Tuniluuttoqarnerata annerpaaffianiilertoqarsimaneranut takussutissaqartoq
- Maannangaaq takusinnaalereersimavarput, summiiffiit ilaanni tuniluuttoqarnera annerpaaffianiilersimasoq, Henrik L. Hansen oqarpoq.
Nunatsinni nakorsaanerup oqaatigaa, ilaatigut Ilulissani tuniluuttoqarnera annerpaaffianiilersimasoq. Tamanna aamma Nuummi takuneqarsinnaasoq, taanna oqaluttuarpoq:
-Maani Nuummi atuarfinnit naparsimasoqarneranik nalunaarutit amerlassusaasa erseqqissumik takutippaat, tuniluuttoqarnera annerpaaffianiilersimasoq.
Nunatsinni nakorsaanerup erseqqissaassutigaa, qaammatit arlallit pinnatik sapaatilli-akunialui qaangiuppata tuniluunnerup annikillinissaa ilimanartoq, inuiaqatigiinnilu killilersuineq taamaalilluni unitsinneqarsinnaanngussalluni:
- Nalinginnaasumik inuuneqalernissatsinnut sapaatip-akunnialuisa qaangiunnissaat apeqqutaavoq, Henrik L. Hansen oqarpoq.
Isornartorsiummut akissuteqartoq
Naalakkersuisup Pele Brobergip aamma ilaatigut Kalaallit Nunaanni Sulisitsisut Demokraatillu coronamut killilersuutit pillugit isornartorsiuisimanerat oqaaseqarfigaa:
- Oqaatigineqarsimavoq killilersuutit naassaanngitsumik ingerlasut. Suliffeqarfiilli amerlanerit ammapput. Taakku pillugit killilersuutinik atuutsitsilersimanngilagut.
- Sapaatip-akunnerani matumani nalunaarutigineqarpoq, killilersuutinik allannguinata killilersuutinilli amerlanerusumik sakkukilliliisugut, assersuutigalugu misissortinnissamut piumasaqaateqarneq atorunnaarsipparput, Pele Broberg oqarpoq.
Naalakkersuisup ilanngullugu erseqqissaassutigaa, nunaqarfinni sullissiviit tamanut ammasut – tassa akiuussutissalerneqarsimasunut akiuussutissalerneqarsimanngitsunullu ammasut. Tamanna sapaatip-akunnerata matuma ingerlanerani qularutigineqarsimavoq:
- Paatsoortoqannginnissaa qulakkeerniarlugu oqaatigissavara, illut sullissiviusut innuttaasunut tamanut ammammata, Pele Broberg oqarpoq.
Inuussutissarsiortunut ikiorsiissutissat Naalakkersuisunit akuerineqarsimasut
Naalakkersuisut aamma inuussutissarsiortunut ikiorsiissuteqannginnerarlugit isornartorsiorneqarsimapput.
Naalakkersuisunilli ikiorsiissutissat akuersissutigineqarsimapput, taakkulu Inatsisartut ataatsimiititaliaanut akuerisassanngorlugut nassiunneqarsimallutik
- Naalakkersuisut killilersuutinik atuutsitsileraangata killilersuutit suliffeqarfinnut qanoq kinguneqarsinnaanerat misissortassavarput Sulisut tamaasa eqqarsaatigalugit tamanna neriorsuutigisinnaanngilarput, ajornartorsiulli aaqqiiffiniarlugu sapinngisatsinnik sulissuteqarpugut, Pele Broberg oqarpoq.