Tusagassiuuteqarfik: Aningaasat milliardilikkaat illersornissaqarfiup Kalaallit Nunaanni imatut atorusuppai
Allagaatit tusagassiuuteqarfiup TV2-p pissarsiarisimasai naapertorlugit 2031-mi umiarsuit nakkutilliissutit nutaat issittumi atugassat sanaartorneqassapput, taamaattorli 2024-ip tungaanut Illersornissaqarfiup aningaasat 2 milliard koruunit missaat Issittumi Sakkutooqarfimmut aningaasaliinissamut atorneqarusullutik.
Tusagassiuuteqarfik TV2 allagaatinik avammut saqqummiussassaanngitsunik pissarsisimavoq, tassanilu ersersinneqarpoq Illersornissaqarfiup pisortaasa ukiunut tulliuttunut aningaasaliissutit qanoq agguarneqarnissaannik kissaateqarnersut.
Illersornissaqarfik annertuumik piorsarneqartussaavoq, allagaatillu takutippaat, Illersornissaqarfiup illersornissaq pillugu isumaqatigiissut nutaaq naapertorlugu aningaasaliissutaasussat 100 milliarder koruuninik annertussusillit ukiuni qulini tulliuttuni atugassai qanoq agguataarneqassanersut.
Aningaasarpassuit taakku ilaat Kalaallit Nunaanni atorneqassasut Illersornissaqarfiup kisaaatigivaa, tamanna TV2-p ilanngutassiaani allaaserisaanilu aamma ersersinneqarpoq.
Ataaseq aningaasarpassuarnik nalilik tassaavoq Illersornissaqarfiup naatsorsuutigimmagu aningaasat 560 millioner krouunit Kangerlussuarmi mittarfimmut nutaamut atorneqassasut, taannalu 2028-miit 2030-ip tungaanut sanaartorneqassasoq.
Pilersaarusiornermik suliaqartitanut qitiusumik aqutsiveqarfik nutaaq
Ukiorpassuanngortuni ilisimaneqarpoq Kangerlussuarmi mittarfik pisoqalisimasoq, aammalu ilisimaneqarpoq Ilulissani Nuummilu nutaanik mittarfiliortoqarneranut atatillugu Danmark aamma Kalaallit Nunaat isumaqatigiissuteqartut, Illersornissaqarfiup iluarsaassineq akilissagaa.
Kangerlussuarmi mittarfiup iluarsaanneqarnissaata saniatigut alla aningaasarpassuarnik nalilik tassaavoq Illersornissaqarfiup kissaatigimmagu aningaasat 600 milllioner koruunit atorneqassasut pilersaarusiornermik suliaqartitanut qitiusumik nutaamik aqutsiveqarfiliortoqassasoq, taannalu 2031-miit 2033-ip tungaanut sanaartorneqassasoq. TV2-p allagaatit pissarsiarisimasai naapertorlugit Imaani Sakkutuut umiarsui atlantikup avannaani Kalaallillu Nunaata imartaani alapernaarsuutaasut pisoqalisimaqisut nutaanik taarsersorneqarnissaat utaqqisinneqartussatut kissaataavoq.
- Aatsaat 2031-miit ukiunilu tulliuttuni arfineq marlunni sakkutuut umiarsuisa alapernaartuutit taarsersorneqarnissaat, aningaasanik 7,4 milliarder koruuninik nalillit isumagineqassasoq TV2 naapertorlugu Illersornissaqarfimmit kissaataavoq.