Tusarniaaneq: Meeraq katsorsarneqarnerup nalaani toquppat angajoqqaat taarsiiffigineqassapput
Napparsimasut taarsiiffigitinnissamut periarfissaannik allannguinissamut inatsisissatut siunnersuut angajoqqaat meeqqaminnik katsorsartinnerminni annaasaqarsimasut ajunngitsorsiassaqartalernissaannik imaqarpoq.
Naalakkersuisut inatsisissatut siunnersuummik tusarniaassuteqarput, napparsimasullu peqqinnissaqarfimmi pitsaanerusumik sunniuteqarluarnerusumillu naammagittaalliuuteqarnissamut taarsiiffigitinnissamullu periarfissaqarnissaasa qulakkeernissaat taassuma pingaarnertut siunertaraa.
Siunnersuut siusinnerusukkut tusarniaassutigineqarsimavoq, maannali tusarniaassutigineqaqqippoq, "meeqqaminnik peqqinnissaqarfimmi suliaritereerlutik annaasaqartunut, malittarisassat naapertorlugit taarsiiffigitinnissamut pisinnaatitaasimagaluartunut" angajoqqaanut oqartussaasunut ajunngitsorsiassaqartitsisoqartalissasoq ilaatigut ilanngunneqarluni.
Ajunngitsorsiassat 184.500 koruuniusut, ukiullu tamaasa nalimmassarneqassasut, siunnersuutip oqaaseqaataani allassimavoq.
- Ukiumut ataasiaannarluni takussaasarpoq
Aaqqissuussinermut aningaasartuutit naatsorsuutigineqarsimasut pillugit Naalakkersuisut ima allapput:
- Aalajangersagaq una pisortanut annikitsumik aningaasartuutinik nassataqassasoq naatsorsuutigineqarpoq, tamannalu qularnanngitsumik ilisimaneqarsinnaanngikkaluartoq, ukiuni siuliini oqaluttuarisaanerup takutippaa suliat taamaattut ukiumut ataaseq sinnerlugu takuneqarneq ajortut, siunnersuutip oqaaseqaataani allassimavoq.
Niviarsiaqqamik arfinilinnik ukiulimmik oqaluttuaq alianartoq pillugu 2023-mi aasakkut ukiakkullu uissuummisitsingaatsiarlunilu oqallisaangaatsiarsimasoq pissutigalugu inatsit siunnersuutigineqarpoq. Niviarsiaraq arfinilinnik ukiulik suliaritilluni neqaajartereernermi kingorna toquvoq. Suliami tamatumani napparsimasut ilaqutaasalu peqqinnissaqarfimmi katsorsartinnermik kukkunermilluunniit naammagittaalliutiginninnissamut pisinnaatitaaffiat sammineqangaarpoq.
7 millionit koruunit taarsiissutissatut
Angajoqqaat ajunngitsorsiassaata saniatigut napparsimasut kukkusumik katsorsarneqarsimasutut misigisimasut taarsiiffigineqarsinnaanerat siunnersuutip aamma annertusissavaa:
- Suliat imminnut attuumassuteqartinnagit immikkoortillugit suliarineqarsinnaassapput, taamaalilluni Napparsimasut Maalaarutaannik Aalajangiisartunit (imaluunniit oqartussaasunit allanit) aalajangiisoqarsimanera apeqqutaatinnagu, aammattaaq aalajangiisimanerup inerneriunnagaa apeqqutaatinnagu taarsiivigitinnissamut apeqqut suliarineqarsinnaalluni, Naalakkersuisut allapput.
Aningaasartuutaasartut siusinnerusukkut 1,5 millionit koruunit missaanniittarsimapput, malittarisassalli nutaat atuutilerpata amerleriarujussuarnissaat ilimagineqarpoq:
- Siunnersuut manna aqqutigalugu napparsimasut maalaarutaannut suliassaqarfik annertusineqarpoq, naatsorsuutigineqarporlu taarsiivigitittussanut aningaasartuutit ukiumut 7 millionit koruuninut qaffassasut, siunnersuummi allaqqavoq.