Tusarniaaneq: Tunumi qilalukkanut qernertanut pisassiissutit ikilisinneqartut
Qilalukkanik qernertanik paggatassiisarneq unitsinneqassaaq aamma Tunumi qilalukkanut qernertanut pisassiissutit ukiuni aggersuni ikilisinneqangaatsiassapput, taamatut siunnersuuteqarpoq Aalisarnermut, Piniarnermut Nunalerinermullu Naalakkersuisoqarfik.
Aappaagu qilalukkanut qaqortanut qernertanullu pisassiissutissat Namminersorlutik Oqartussanit maannakkorpiaq tusarniaassutigineqarput. Pisassiissutissanut nutaanut siunnersuut naapertorlugu, Tunumi pisassiissutigineqartartut ikilisinneqarnissaat kissaatigineqarpoq.
2021-mi pisassiissutissat 40-ssasut siunnersuutigineqarpoq, ukioq manna 50-iusimallutik. Ukiuni aggersuni Tunumi pisassiissutigineqartartut ukiumut quinik ikilisinneqartassapput.
Tamatumunnga pissutaavoq, sumiiffimmi pisaqartoqartannginnissaannik biologit siunnersuisimanerat. Taamaalilluni sinnersuisimaneq malillugu piniartarneq unitsinneqavissaaq, Naalakkersuisulli sumiiffimmi neqissaqarniarneq eqqarsaatigalugu, pisassiissutaasartut ikilisikkiartuaarneqarnissaat aalajangersimavaat:
- Ukiuni sisamani pisassat milliartuutaasumik ikiliartuaartinneqarnissaannut siunertaavoq, inuussutissarsiutigalugu piniartut ukiumi pisaqarfiusussami naatsorsuutigisami piniagassaminnik naleqqussarnissaminnut taartaasinnaasunillu piniagaqarnissamik ujartuinissamut periarfissinneqarnissaat piniarlugu, tusarniaanermut atatillugu allakkiami allassimavoq.
Pisassiissutit politikkikkut akuleruffigineqarusunngittartut
Kitaani pisassiissutit 2020-misulli katillutik 424-ussapput. Akerlianik Qaanaap Upernaviullu eqqaanni qilalukkanik qernertanik paggattassiissuteqartarneq atorunnaarsinneqassaaq. Tamatumunnga pissutaavoq pisaqarpallaartoorsinnaanerup minnerpaamiitinneqarniarnera.
Tunumi qilalugaqassutsimik illersuiniarluni piniartarnermik unitsitsisoqarnissaanik siunnersuut erseqqilluinnaraluartoq, Naalakkersuisut ilaatigut malinniarlugu aalajangersimanerat politikkikkut akulerukkusunnginnermik kinguneqarsinnaavoq.
Naalakkersuisut nungusaataannitsumik piniartoqartarnissaanik aalajangiisimagaluartut - tassunga ilanngullugu biologit siunnersuutaannik tusaaniartarnissamik aalajangiisimagaluartut, siunnersuut politikkikkut tamanit isumaqatigineqanngilaq
Inatsisartut amerlanerusunik pisassiissuteqartarusuttut
Partiit sisamat siorna ukiakkut Naalakkersuisunut allagaqarlutik, Avannaani Tunumilu qilalukkanut qernertanut pisassiissutit 100-nngorteqqusimavaat. Partiit sisamaasut taakku ilagaat partiit naalakkesuisuutitaqartut Siumut Nunattalu Qitornai.
Naalakkersuisut akuersaaginnarsimapput, 2019-imilu oktobarip qaammataani 48-nik immikut pisassiissuteqarlutik.
Aamma ukioq manna Upernavimmut Tasiilamullu immikkut pisassiissuteqartoqarpoq.