Tuttunniarneq aallartippoq: Politiinit siunnersuutitsialaat atuakkit
Tuttunniarneq aggustip 1-ani aallartippoq, taamaattumik aaqqissuisoqarfiup Kalaallit Nunaanni Politiinit, sunngiffimmi piniartartunut siusinnerusukkut inassuteqaatinik pingaarutilinnik avitseqatiginnissimasunit, siunnersuutitsialaat alakkaqqippai.
Aaqqissuisoqarfiup nalunngilaa, siunnersuutit taakkua aallaaniartartorpassuarnit ilisimaarineqarluartut, imaassinnaavorli tamakkua arlaannit iluaqutigineqartut. Tamassi piniarluarisi.
Tuttunniarnissamik pilersaaruteqartunut eqqortunik atortoqarnissaq angalanissamullu piareersarluarsimanissaq aalajangiisuulluinnarpoq. Taamaattumik Kalaallit Nunaanni Politiit pingaarutilinnik siunnersuuteqarput arlalinnik, kikkut tamarmik piniarnermik misigisat isumannaatsumik akisussaassuseqartumillu iluarusuutiginninnissaannik qulakkeerinnittunik.
Aallannginnermi pissutsit arlallit inissinneqarsimasariaqarput. Pingaarnertut piniarnermut allagartaqartariaqarpoq atuuttumik, aamma tuttuniarnissamut umimmanniarnissamut akuersissummik eqqortumik.
Imaatigut sillimaniarnissaq eqqaamallugu
Aallartinnak sakkuit misissornissaat illoqarfiullu avataani nakersarnissaat aamma isumagiuk. Tuttunniarfimmi nutaamukassaguit, sumiiffiup misissoqqaarnissaa isumassarsiatsialaasinnaavoq, assersuutigalugu Google Maps iluaqutsiullugu. Tamatuma saniatigut inassutigineqarpoq, minnerpaamik ataatsimik angalaqateqarnissaq, allanik angalaqateqarluni isumannaannerusinnaammat aamma piniarnermik misigisanik avitseqateqarneq nuannernerusinnaammat.
Aallaanianut ornigassaminnukarlutik imaatigut angalanissamik pilersaaruteqartunut imaatigut isumannaallisaanerup eqqaamanissaa pingaaruteqarpoq. Annanniutinik puttaqutinik ilaasunut tamanut nassataqartoqassaaq, angalanermilu taakkua ajornanngippat atorneqassallutik. VHF-radiomik sarfalersuutaasinnaasumillu aamma nassataqartoqassaaq, ajornartoornermilu kanali kanal 16 tusarnaarneqassalluni.
Piniarneq aallartippat silap allanngoriataartarnera piareersimaffigineqassaaq. Oqortunik naleqquttunillu atisaqarnissaq pingaaruteqarpoq, aamma annoraaminermik allamilluunniit qalipaatigissaartumik nassataqarnissaq isumassarsiatsialaavoq, tammartajaalissagaluaraanni takuneqarsinnaanissaq anguniarlugu. Aallaaniarnerup nalaani akuttunngitsumik kingumut qiviartarnissaq pingaaruteqarpoq, sumiiffik aqunneqarsinnaaniassammat.
Attaveqaatit pitsaasut eqqaamakkit
Putserpallaalissagaluarpat pujuernissaata tungaanut angalanissap utaqqisinneqarnissaa inassutigineqaarpoq. Qaqqat qaavini mobilimut signalit pissarsiarisinnaagaanni angerlamut sianertaraiqarpoq sumiinnerlu oqaluttuaralugu. Aamma sumiiffimmut naleqqat ilisimaarinissaat isumassarsiatsialaavoq, taakkua GPS-imi imaluunniit smartphonemi pissarsiarineqarsinnaapput, pisariaqalissappat allanit nassaarineqarnissaq ajornannginnerulersinniarlugu.
Attaveqatigiinneq pitsaasoq ikiorneqarnissamullu periarfissat qulakkeerniarlugit angalanermi VHF-imik angallattakkamik nassataqarnissaq inassutigineqarpoq, pingaartumik sumiiffimmi mobilinut attaveqanngippat. Tamatuma saniatigut tuttunniarnerup nalaani kingusinnerusukkut taarsiaarnerusarnera eqqumaffigineqassaaq, taamaattumik qaammartartumik qaamut atisartakkamik qaammaqqutinillu allanik nassataqarnissaq isumassarsialaavoq.
Kalaallit Nunaanni Politiit kaammattuutigaat siunnersuutit tamakkua aallaanianut tamanut avitseqatigiissutigineqassasut aamma aallaanialinnginnermi kikkut tamarmik ilisimatilluarneqarsimanissaat isumagineqassasoq. Peqatigiilluta toqqissisimanermik pilersitsisinnaavugut aamma tuttunniarnermik isumannaatsumik tamanut nuannersumik qulakkeerinnissinnaavugut.