Tuttut pisareriarlugit qimaannakkat: Piniarneq ingerlaannartumik unitsinneqartoq
Namminersorlutik Oqartussat Nuussuup qeqertaasaani ukiuunerani tuttunniarneq ingerlaannartumik unitsikkallarpaat, qeqertaasami tuttut pisarineqartut quttoraaginnarlugit qimanneqartarnerat paasineqarmat.
Annonse
Unioqqutitsilluni piniartarneq pissutigalugu Namminersorlutik Oqartussat Nuussuup qeqertaasaani tuttunniarneq unitsikkallarpaat.
Aalisarnermut Piniarnermullu Naalakkersuisoqarfik ilisimatitsivoq unitsitsigallarnermut peqqutaasoq paasineqarsimammat qamutit motoorillit atorlugit tuttunniartoqarsimanera aammalu ilaatigut tuttut pisarineqarsimasut quttoraaginnarlugit qimaannarneqartarsimanerat.
- Unitsitsigallarneq atuutissaaq suliap qanimut misissorneqarnerani, naalakkersuisoqarfik allappoq.
Naalakkersuisoqarfik erseqqissaavoq nalunaarut atuuttoq naapertorlugu tuttunniarnermi qamuteralannik atuineq inerteqqutaasoq, tuttullu nerineqarsinnaasut tamaasa angerlaanneqartussaasut.