Tuusi: Tunuarnianngilanga
- Kalaallit Nunaanni eqqartuussisut eqqartuussisussaatitaanerannik qulakkeerineq suujunnaangajassimavoq. Taamatut oqarpoq Josef Motzfeldt Inatsisartut Suleriaasiannut Ataatsimiititaliamut ilisimatitsilluni tallimanngornermi ullaatungaa ataatsimeereernerup kingorna.
- Suliassap suliarineqarnerata ingerlanerani uanga akuleruteqqusaanngilanga. Taamaattumik uanga siulittaasoqarfiup imaluunnit Inatsisartut Suleriaasiannut Ataatsimiititaliap ataatsimiinerini peqataasinnaanngilanga, politiit susoqarnissaannik aalajangiitinnagit. Kisianni uanga tunuarnianngilanga. Tamanna Inatsisartut Suleriaasiannut Ataatsimiititaliami ilaasortat tusaatissatut tiguaat.
Taamatut oqaluttuarpoq Inatsisartut siulittaasuat Josef Motzfeldt, Inatsisartut Suleriaasiannut Ataatsimiititaliaq tallimanngormat ullaap tungaatigut ilisimatitsissuteqarfigereerlugit. Tamanna pivoq pingasunngormat illuminiit nuunnissaminut atatillugu ikiaroornartumik hashimik nassaartoqarsimanerata kingorna akulerutsinneqarnermi kingorna.
- Pisoq assut aalassussutigaara, assut nikanarsagaasutut misigisimavunga allat angerlarsimaffinniissimammata, hashimineq nassaarisimaneragartik annillugu tamatuminngalu uanga ilisimatinnanga - kiisalu avaqqullunga tusagassiutinut aamma politiinut saaffiginnissimallutik. Tamanna akuerisinnaanngilara, Josef Motzfeldt oqarpoq, ilisimanngilluinnarpaalu kiap soqutigisarissaneraa pisoq taamaattoq avammut saqqumiutissallugu:
- Illunni inunnik najugaqartoqartuaannarsimavoq kiisalu assigiinngitsunik inisimasoqartarsimavunga. Pissutissaqanngilluinnarpunga imaaluunniit tunngavissaqarnanga pisumi matumani kimilluunnit pasinninnissannut, Josef Motzfeldt oqarpoq, ullumikkut kingusinnerusukkut ISS-ip pisortaaneranik Jesper Hansenimik ataatsimeeqateqartussaq.
- Kisianni tamanna uannuinnaq tunngavoq, Josef Motzfeldt oqarpoq, naqissuserlugulu inuinnaq Motzfeldt taamatut iliorniartoq Inatsisartuni siulittaasuunngitsoq.