kabel-tv
Tv-kanalit annertuumik akitsorneqalerput
Nanoq Media tv-mi isiginnaagassat akitsorneqarnissaannik nalunaaruteqarpoq, danskit tv-nik isiginnaartitsisarfiinit qaangeerujussuartunik.
Nunatsinni tv-kanalinik isiginnaarsinnaaneq akisoreerpoq, decembarip aallaqqaataanilu suli akisunerulissaaq.
Pissutaasoq
''Timersortunik aallakaatitsisinnaanermut'' aamma ''nalinginnaasumik isiginnaagassiornermut aningaasartuutit qaffasinnerat'' akit qaffattariaqarnerinut pissutaasut, Nanoq Media ilisimatitsivoq.
Atuisuugaanni Grundpakke, Pakke 2 aamma Sportspakke pigalugit 6,45 procentimik akitsuiffigineqartussanngorput. Tassami qaammammut akiliutigisartagaq 682 koruuninit 726 koruuninut qaffassaaq.
Youseemi, Danmarkimi kabel-tv-mik neqerooruteqartartut annersaanni aamma januaarip aallaqqaataani 2018-mi akinik qaffaasoqarnissaa nalunaarutigineqarpoq. Tassani toqqagassaq anneq 25-nik kanalilik kanalinik 36-nik toqqagassartaqartoq 559 koruuninit 579 koruuninut qaammammut qaffassaaq, tamannalu 3,58 procentimik qaffariarneruvoq.
Allatigut tv-mik isiginnaarneq
Nanoq Mediami pisortaq, Bjørn Holm, immikkut ittumik akit qaffanneqarnerat, maanna allatigut tv-mik isiginnaarsinnaalernermik nassuiaatitaqartippaa, soorlu iphonemik aamma android telefoninit, ipadsinit aamma tabletinit aamma Apple tv-ikkut.
- Taamatut nutaamik kiffartuussilernermut tv-pakketsinnut akitsuutinut aningaasartuutit ilaapput, Bjørn Holm, Sermmitsiaq.AG-mut nassuiaavoq. Nutaanik isiginnaaruteqarsinnaalernerup akit qaffanneqarnerisa affangajaanik pissuteqartoq pisortaq naliliivoq.
Youseemi tv-pakke annerpaaq qaammammut 579 koruuneqarpoq, tamannalu Nanoq Mediami pakkemut assingusumit 150 koruunimik akisuneruvoq.
Isumaqatiginninniarnermi iluaqutissaqartut
- Yousee 1,2 millioninik atuisoqarluni akerlianik uagut 4.000-iinnarnik atuisoqarluta kanaleqartitsisartunut akinik pitsaanerusunik isumaqatiginninniarsinnaanermut iluaqutissaqarput, Nanoq Mediami pisortaq ilisimatitsivoq, taassuma atuisut killissaannut paasinninnissinnaasariaqarlutik nalunngilaa.
- Kisianni atuisugut aamma ukiut tamaasa qaffaasoqartarneranik sungiusimasaqarput. Ukiuni kingullerni ajoraluartumik timersortunik aallakaatitsisinnaanermut pisinnaatitaaffiit qaffakkiartuinnapiloornikuupput, taanna naqissusiivoq.