Uffe Ellemann: Ataatsimeeqataannginneq pilerlaap kukkuluttornerisimassagaa
Siornatigut nunanut allanut ministeri Uffe Ellemann-Jensen Naalakkersuisut siulittaasuata Issittumi Siunnersuisoqatigiinni ataatsimeeqataannginnera aamma isornartorsiorpaa - neriulluni pilerlaap kukkuluttornerigaa
Aammaasiit Naalakkersuisut siulittaasuat Aleqa Hammond isornartorsiorneqaqqippoq sapaatip-akunnerata siuliani Issittumi Siunnersuisoqatigiinni ministerit ataatsimiinnerannut peqataanginnini pillugu.
Tamatumuuna Danmarkip siornatigut nunanut allanut ministererisimasaa Uffe Ellemann-Jensen Naalakkersuisut siulittaasuannik isornartorsiuivoq.
- Ajoraluartumik sapaatip-akunnerata siuliani Issittumi Siunnersuisoqatigiit Kirunami ataatsimiinneranni nipilutsitsisoqartoorpoq: Kalaallit naalakkersuisui nutaat nerrivimmi inissaqartinneqannginnamik ima ajuallatsigipput ataatsimiinnermut puttutinngilluinnarlutik. Uggorineqarsinnaavoq (aamma tupigineqarluni) ajornartorsiummut sammisumik inerniliuutaasinnaasumik nassaarniartoqarsimannginnera, politikeri misilittagartooq ilaatigut Venstremut siulittaasuusimasoq allappoq.
Nangipporlu:
- Siornatigut naalagaaffeqatigiinni issiaqatigiissinnaajuarpugut - aamma Issittumi Siunnersuisoqatigiinni ilaasortat arfineq-pingasuunerat avaqqunneqarsinnaanngilaq, arfineq-pingasuinnaat! Kalaallit Nunaannut immikkut ittumik nerriviliortoqassappat Ålandip Qeqertai aamma Savalimmiormiut assingusunik piumasaqaateqalissapput. .. Uggornarporli Kalaallilli nunaata nammineq suliami peqataanissani soqutigilluinnarmagu.
Neriuppunga pilerlaap kukkuluttornerissagaa
- Neriunnarpoq pilerlaap kukkuluttornera pineqartoq naalakkersuisut taamak nutaajutigisut immaqa suli nunat tamalaat akornanni suleqatigiinnermi pissusilersuutissanik ilikkarsimanngillat. Naalakkersuisut siuliisa pilertortumik pikkorillutillu nunat tamalaat akornaani eqaatsumik suleriaaseqarsimapput.... aamma taamannak nammineq soqutigisanik aallussisoqartussaavoq. Pingaartumik piffissami massumani kikkut tamarmik amaqqutut perlilersutut pinngortitami iluanaarutaasinnaasunik ujarlernerisa nalaanni Uffe Ellemann-Jensen Berlingskep nittartagaani blogimini allappoq.