Ilulissat
Ujajaariartut suli ujaaraat
Angutit inuusuttut marluk arfininngornermi sakkulerlutik Ilulissani ujajaariaraluartut suli tigusarineqanngillat
Ilulissani Anton Geislerip pisiniarfeeraataanut sakkulerluni ujajaariaraluarneq pillugu politiit annerusumik suli paasisaqanngillat. Angutit kiinarpallit marluk sakkulerlutik arfininngormat ujajaariaraluarput pisiniarfeeqqap piginnittua 94-nik ukiulik sulitillugu.
Ilulissani politiit suli soqutigaat innuttaasunit saaffigineqarnissartik arfinngorneq decemberip 28-iat Illumiut aqqutaanni Anton Geislerip pisiniarfeeraanut nalunaaqutaq 15.45-up missaani sakkulerluni ujajaariartoqareersoq.
Ujajaariartup aappaata aallaamik 94-nik ukiulik qunusaaraluarpaa, taassumali oqarasuaat tigusinnarlugu politiit kalerrikkasuarpai.
Anton Geisler Sermitsiaq.AG-mut oqaluttuarpoq politiit oqaluuttuusaarsimallugit. Tamannali naammassimavoq ujajaariat qimaatinnissaannut pissarsinatillu Uiarsaariap Enok Kristiansenillu aqqutaata akornanni inuit aqqutaatigut avannamut qimaasimapput. Ujajaariarneq pillugu politiit nalunaaqutaq 15.45-up missaani nalunaarfigineqarput.
Ujajaariartup aappaa imatut oqaluttuarineqarpoq: Angut inuusuttoq kalaaleq, 170-175 centimeterisut angitigisoq nerinnattuunanilu tuattuunngitsoq. Taanna ataasiaannaq atortakkamik atallaaqarsimavoq nasaasalimmik. Qaqortumik kiinarpalersimasoq isaasa qarngatalu nalaanni putuneqarsimasumik. Aaqqateqarsimassagatinneqarpoq. Nassataraa nammattagaq sinaatungimigut qasersoq aappalungusesoq. Aallaat qasersoq plastikimik timitalik nassarpaa.
Ujajaariartup aappaa imatut oqaluttuarineqarpoq: Angut inuusuttoq, kalaalerpaluttumik isikkulik 170- 175 centimeterimik angissusilik tuattuunanilu nerinnattuunngitsoq. Qernertumik jakkeqarpoq qernertunik qarlippaaqarluni aaqqateqassangatinneqarlunilu. Nammattagaqarpoq qernertuusorineqartumik.
Ilulissani politiit takunnissimasinnaasunik imaluunniit ujajaariarnermut paasissutissaateqarsinnaasunik oqaloqateqarusupput. Politiit attavigineqarsinnaapput oqarasuaat 701422 imaluunniit mobil 543822 atorlugit.