Ujarak Arnold Classic-imi angusarissaartoq
Kim Ujarak Lorentzen Tuluit Nunaanni Arnold Classic unammersuassutigineqarmat normu 8-nngorpoq.
Nunatsinni angutini nukittunerpaaq Kim Ujarak Lorentzen sapaatip-akunnerata naanerani Arnold Classic Strongman Tuluit Nunaanniittumi Birmingham-imi unammersuassutigineranut peqataavoq.
Sungiusaasup Allan Juhlip Sermitsiaq.AG-mut ilisimatitsissutigaa, Ujarak tallimanngornermi dødløft unammissutigineqarmat normu 4-tutu inississimasoq. Tamatuma kingornatigut sand-back tossed unammissutigineqarmat normu 7-inngorsimalluni.
Ullormi siullermi unammersuartoqarnerata kingorna arfininngornermi inaarutaasumik unammisoqannginnerani Kim Ujarak Lorentzen normu 5-itut inissisimasimavoq.
Inaarutaasumik ajugaaniutivinnermi yoke 500 kiiluumik oqimaassusilik Ujaqqap unammissutigisimavaa. Tassunga tulliullugu kivittaagaasartoq 100 kiilumik oqimaassusilik unammissutigineqarmat Ujarak normu 8-nngorsimavoq.
Nuannerluinnartumik naggasiisoqarsimasoq
Allan Juhl oqaluttuarpoq, unammersuarneq naggaserlugu "atlas atones" 120 kiiluniit 200 kiilut tikillugit oqimaassusilimmik unammssuteqarnermi nunatsinni nukittunerpaaq nuannerluinnartumik naggasiisimasoq.
Tassani Ujarak tusaamasarsuarmit Big Z-imit pingasoriarluni nunarsuarmi pissartanngorsimasumit aamma Arnold Classic-imi arfineq-pingasoriarluni pissartanngorsimasumit angusarissaarnerusimavoq.
- Unammeqataasunit 14-iusunit tallimaannaat stonesinik tamanik kivitsisimapput, aap tulluussimaaqaagut, Allan Juhl oqarpoq.
Ujarak nunarsuarmi nukittunerpaat tamarmiusut akornanni peqataasunit 14-iusunit normu 8-nngorpoq.