pilluarit
Ujarassiooq Tunumi qaqqanik magma-linnik misissuinerminik nersornaaserneqartoq
Ilisimatooq Christian Tegner Tunumi Skærgaard Instrusionen-imi qaqqanik magma-linnik misissuinerminik Danmarks Geologipris 1013-imik nersornaaserneqarpoq
Danmarks Geologipris 2013 arfininngormat marsip 29-anni ilisimatuumut Christian Tegner-imut, Aarhus Universitetimi Institut for Geoscience-meersumut, tunniunneqarpoq. Nersornaat 25.000 koruuninik aningaasartalik tunniunneqarpoq Atlantikup avannaani qaqqanik magma-linnik misissuisimanera nalissaqanngitsoq pissutigalugu, pingaartumillu Tunumi Skærgaard Instrusion-imik taaneqartumi qaqqanik magma-linnik ilisimatusarsimanera pissutigalugu.
Skærgaard Instrusionen magma-qarfikuuvoq ukiunik 56 mio.-inik pisoqaassusilik, magma-qarfiusimasumut iseriarfissaqqissoq. Qaqqat artit, magma-qarfiup pilersinneqarnerani tunngaviusut qanoq pissusilersorsimanerat misissorneqarsinnaavoq. Lag-ikkaartumik intrusion-imik taaneqartoq, magma piffissami sivisuumi issoriartorsimalluni, qaqqallu artit assigiinngitsut taarserartarsimallutik magma-p issoriartornerani kissassusaanik assigiinngitsunik sunnerneqarlutik.
Ukiorpassuarni ilisimatuut nunarsuarmit tamarmeersut tamanna sammisimavaat, tamakkualu ilagaat Christian Tegner, magma-qarfiup pilersinneqarneranik qaqqanillu magma-linnik paasititseqataasimasoq.
Skærgaard Instrusionimi misissuinermi sanaitigut Christian Tegner Islandimi qaqqanik magma-linnik sammisaqarsimavoq qanittukkullu Avannaani Kap Washington-imi qaqqat innermik anitsisartuusimasut sinnikuinik misissueqataasimalluni.
Nersornaat tunniunneqarpoq GEUS-ip pisortaaneranit Johnny Fredericia-mit, Dansk Geologisk Forening-ip Københavnimi Geocenter Danmark-imi ukiumoortumik ataatrsimiinnerani.
Danmarks Geologipris 25.000 koruuninik aningaasartalik ukiumoortumik tunniunneqartarpoq De Nationale Geologiske Undersøgelser for Danmark og Grønland-imit (GEUS), Dansk Geologisk Forening-ip inassuteqarnera malillugu.
Nersornaat tunniunneqartarpoq inummut inunnulluunniit, ukiuni kingullerni tallimani ilisimatuutut allaatigisamik imaluunniit nunap assinganik ataatsimik arlalinnilluunniit saqqumiussisimasumut, Danmarkip Kalaallillu Nunaata sananeqaataannik immikkut paasititseqataasimasumut.