KL

DK

Ujarassiorit 2022: Ujarak oqimaassutsimisut kuultitut nalitutigisoq

Malu Ravnip nassaani neqiminiusorisaa paasinarsivoq tassaasoq ujarak akileraaruteqanngitsunik 55.000 koruuninik nalilik.

Kurt Kristensen
Published

Aalisartoq piniartorlu Malu Ravn, 44-nik ukiulik, ulluinnarni inuunermini puisinniarnermik, timmiarniarnermik aalisarnermillu aallutaqarpoq, pisaanilu Qaqortumi kalaalimineerniarfimmi tuniniartarlugit, asimiitillunili neqiminermik allaalluinnartumik takusaqarpoq.

- 2020-mi ukiakkut ataatagalu, Mylius Gabrielsenilu umiatsiamik angalaartilluta Qaqortukuluup Tasiusaata Qinnguata Kuuata eqqaani nunamut qaqigatta. Quiniarlunga eqqara misissorakku. Ujaqqamik nalinginnaanngitsumik takusaqarama, qaarsumut ilaasumik. Ujarak neqitut isikkoqarami, paaserusulerlugulu angerlaakkusulerakku, Malu Ravn Sermitsiamut oqarpoq.

Aaqqissuisuuneq innersuussivoq: ​​​​​​

Allaaserisaq una aviisimit Sermitsiamit tigusaavoq, aaqqissuisuunermit Dorthe Olsenimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu.

Angerlaassiniarnerali imaaliallaannarlugu naammassineqarsinnaannginnami. Tassami Malu Ravn kaattamik nassataqannginnami. Tigusiniarnissaraluaminut taarsiullugu ujarak qaarsumiittoq nassaarfinilu assilivai, aatsaalli ukioq ataaseq qaangiummat kuuk pineqartoq uterfigeqqippaa – tamatumuuna kaattamik pitsaasumik nassataqarluni. Qaarsup ilaa neqimut assingusoq kaattarlugu peeriarlugu unammisitsinermut Ujarassiorimut nassiuppaa.

Qanittukkullu aatsitassanut naalakkersuisup Naaja H. Nathanielsenip tamanut nalunaarutigisinnaanngorlugu Malu Ravn ujarassiorit 2022-mi akissarsiassamik pingaarnermik akileraaruteqanngitsunik 55.000 koruuninik aningaasartalimmik ajugaasuusoq.

Ujaqqallumi neqimut assersuunneqarnera tulluarluinnarpoq.

- Ujaqqami ajugaassutigineqartumi aappaluttortaasoq, Malu Ravnimit maluginiarneqarsimasoq tassaavoq ivisaaq, qorsuttai tassaallutik amfibolit, aamma qaqortut qulloornerinut pisimasut tassaallutik calcit, ujarassiorimmi ataqatigiissaarisoq ujarassiooq Pele Tobiassen Sermitsiamut oqarpoq.

Ivisaaq saviminissaavoq, qanga aamma ujaqqamik aattalimmik taaneqartartoq. Qallunaatut taaguutaa hæmatit Griikerit oqaasiannit haimatoeis-imeersuuvoq, isumartoq aattalik.

Ujaqqanik soqutiginartunik ujaasisartoq

Malu Ravn eqqaamannissinnaaleramili ujaqqanik katersisarsimavoq. Ujaqqanik soqutiginninnera angutaaneersuuvoq, Mylius Gabrielsenimit, taannami nammineq ujaqqanik katersisarami, meeraaneranilu angerlarsimaffianni iikkamut nipitillugit assiliaatigisaramigit.

Saffiugassanik ujaasisitsinermi ukioq manna ajugaasoq Malu Ravn nukkani Tukummeq, jornguni Asana aamma aappani Ellen asimeeqatigigai.

Malu Ravn ukiut arlallit matuma siornagut aatsitassanik nassaarsiuutut pikkorissarnermut peqataasimavoq, Kommune Kujallermit Majoriaq suleqatigalugu aaqqissuunneqartumut, tamatumani inuusuttut 40-t pikkorissarnermi peqataallutik.

Malu Ravn Narsami Inuussutissalerinermik ilinniarfimmit Inuilimit 2016-imi procesteknikeritut naammassivoq.
- Namminersortutulli ingerlatsinissara pileriginerugakku, Malu Ravn oqarpoq.

Umiatsiaaqqamik 16 fodsimik pisivoq, atortulersoriarlugulu inuussutissarsiutigalugu aalisartunngorniarluni qinnuteqarluni.

Aamma februaarip aallaqqaataanni 2018-imi Kommune Kujalleq facebookimi quppernermini ima ilanngussaqarpoq ”Anguniakkatit anguniarlugit sulissuteqarit”, taamanikkummi Malu Ravnip akuersissut pissarsiaraa.
- Aalisariaraangama piniariaraangamalu ujaqqanik soqutiginartunik aamma ujaasisarpunga, Malu Ravn oqarpoq.

Ujarassiorit 2022-mi ujarak ajugaassutaa Ujarassiorimmut nassiussaanni siullersaavoq, unammisitsinermulli nassiussaanni kingulliussagunarani.

Aningaasat sumut atussavigit?

- Sumut atussanerlugit suli aalajangiutinngilara, maannamulli Qaqortup eqqaa pisarnerminit sikorsuaqarnerujussuugami. Aningaasalli soqutigivallaanngilakka, tamatumami akerlianik Ujarassiorimmi ajugaasutut akissarsitinneqarnera nuannaarutigisorujussuuara tulluusimaarutigalugulu, ujaqqanik katersisartut allat peqatigalugit, Malu Ravn oqarpoq.

Nuna tummaarisarput

Nuna tamakkerlugu saffiugassanik ujaasisitsisarneq Ujarassiorit 1989-imi aallarnerneqarpoq. Taamanimiilli inuit ujaqqanik pinngortitamillu soqutigisallit saffiugassanik misiligutissanik nassiussisarput, tamakkulu aatsitassanut inatsisinillu atuutsitsinermut Naalakkersuisoqarfimmi ujarassiuunit misissoqqissaarneqartarlutik.

Ujarassiorit 2022-mut ujaqqat misissugassat 248-t nassiunneqarput. Misissorneqartuni 28-t saffiugassannguussimasunik takussutissartaqartut paasineqarpoq, aamma saffiugassanik akoqarnerat paasiniarlugu akoorutissat atorlugit misissoqqissaarneqarlutik.

Misissugassatut nassiunneqartut 248-t ukiut siuliinut sanilliullugit ikinnerungaatsiarput, ukiummi siuliini ujaqqat misissugassatut nassiunneqartartut 600-t aamma 1.100-t akornanniittaramik. Naalakkersuisoqarfiup nassiunneqartartut ikileriarnerannut nassiussat kinguaattoortarnerat patsisaanerarpaa, aallaqqaammut saffiugassanik ujaasineq siorna taamaatiinnarneqartutut nalunaarutigineqarpoq, sapaatilli akunnerani kingullermi ujaqqani misiligutissatut nassiunneqartuni ajugaasut arfineq-pingasut saqqummiunneqarlutik.

Aatsitassanut inatsisinillu atuutsitsinermut naalakkersuisup Naaja H. Nathanielsenip ukiut ingerlaneranni nassitsisartorpassuit nuannaarutigai, tamakkumi aamma saffiugassanik soqutiginnittunit soqutigineqarluartarmata.

- Inuit nuna tummaarisarput paasisaqarfigerusuttuaannassagaat neriuutigaara, Naaja H. Nathanielsen oqarpoq.

Nuna tamakkerlugu saffiugassanik ujaasisitsisarnermi aalajangiisartut tassaapput, ujarassiuut aatsitassanut inatsisinillu atuutsitsinermut Naalakkersuisoqarfimmi atorfillit aamma atorfillit Danmarkimi Kalaallit Nunaannilu nunap qanoq issusianik misissuiffimmi GEUS-imeersut.

inuiagatigiit nunatsinnit ilisimatusarneq
Powered by Labrador CMS