Ujarassiorit: Ujarak ajugaassutaasoq 55.000 koruuninik naleqartoq

Ujarassiortitsinermi ajugaasut saqqummiunneqarput, akissarsiallu annersaannik 55.000 koruuniusunik Ludvig Noahsen nunaqarfimmit Narsarmijiineersoq pissarsilluni.

- Ludvig Noahsen-ip nassaaraa ujarak ujaqqanit aassimasunit pinngortoq annerusumik mineraalimik amfibolimik sananeqaateqartoq, Narsarmijit kilometerinik qulinik kippasitsigisumi qeqertami Avallermeersoq, Namminersorlutik Oqartussanit tusagassiorfitsigut nalunaarummi allassimavoq.

Ujarak imerpalasunik kissartunit allanngortinneqarsimarpasittoq akusiorlugulu misissuinermi paasineqarpoq aatsitassat pisariaqartinneqartut assigiinngitsut akuusut tassaasut aatsitassat qaqutigoortut, soorlu sarfaliuutini anorip erngullu nikuginik innaallagissiutinini aammattaarlu biilit innaallagiatortut motoriinut, atuisut atortorissaarutaannut assigiinngitsunut, teknologimilu nutaaliaasumi atorneqartartut.

Nunami sumiiffinnit assigiinngitsuneersut

Akissarsiassat annersaata tullia 25.000 koruuninik 25.000 aningaasartaqartoq Simujoq Nathanielsenimut, Sermiligaameersumut tuninniunneqarpoq, taassuma nassaarisimavaa qaarsup ujaraa sulfiditalimmik kvarts-itaqarluartoq, Sermiligaap kangimut avannaani 200 km-isut ungasitsigisumi Nuugaalimmi qaarsumit nassaajusoq.

Akissarsiassat pingajui marluusut tamarmik immikkut koruuninik 10.000-inik aningaasartaqartut ukununnga tunniunneqarput:

Henrik Emanuelsen, Nanortalimmeersoq, nassaarimmagu nunngarut kvarts-isiusoq Ikerasassuup kangisissortaani qaarsmeersoq.Ujarak taanna naliginnaasumik annertunerusumik aatsitassanik qaqutigoortunik neodymium-imik, praseodymium-imik og samarium-imillu akoqarpoq. Aatsitassat taamak ittut naliginnaasumik Kujataata kippasinnerusortaani avannarpasinnerusortaanilu nassaassaapput.

Ludvig Knudsen, Kangersuatsiamiit, ujaqqamik ikiariiaartumik manngertornisumik Kangersuatsiap avannaaniittumi qeqertami Annertusumi nassaarsimasoq. Ujaqqap akorai aatsitassat qaqutigoortut naliginnaasumik annerusumik akuusut. Nassaarfiup eqqaani kuuit sioraanik katersani arlaqanngitsuni aatsitassat qaqutigoortut naliginnaasumik annerusumik akuunerat taamaallaat maannamut ilisimaneqarpoq.

Ujaqqat 384-it misissugassanngorlugit nassiunneqarsimasut

Akissarsiat sisamaat tamarmik 5.000 koruuninik aningaasartallit ukununnga tunniunneqarsimapput:

• Otto Larsen, Attumiit, nassaaraa Attup kujammut kangiani Ikorfani ujarak aqerluusassartaqarluartoq. Aqerluusassaq (grafit) nassaarfimmiit kujasinnerusumi Eqalussuarni nassaassaavoq. Grafit-imik pisariaqartitsineq annertusiartorpoq, atorneqartarporlu batteriinut lithium-italinnik sanaartornermut.
• Mininnguaq Josefsen, Nuummeersoq, nassaaraa ujarak ujaqqanik aassimasuneersoq akoqartoq naliginnaasumik annerusunik lithium, zirkonium aamma aatsitassat qaqutigoortut. Ujarak Kapisilinniit 12 km-isut kujasitsigisumi nassaajuvoq.
• Per N. Hansen, Nuummeersoq, nassaaraa ujarak ikiariiaatoq kvarts-itaqarluartoq Arsuup qeqertaata kangiani Niaqornaneersoq.Ujarak naliginnaasumik annerusumik aatsitassanik qaqutigoortunik akoqarpoq. Nassaap akuisa ilisarnaataat kujasinnerusumi Gardar-provins-imik taaneqartartumi ujaqqat akuisa ilisarnaataannut eqqaanaateqarpoq.
• Pauline Qaerngaaq, Qaanaaq, nassiussaraa qaarsup ujaraa kvarts-itaqarluartoq kuultimik (tonsimut 0,16 gram) akoqartoq. Qaanaap eqqaani kuulteqarnera maannamut ilisimaneqanngilaq.

2021-imi Ujarassiorimmut ujaqqat 384-it nassiunneqarsimapput, taakkunanngalu ujaqqat 135 akusiorlugit laboratoriami misissorneqarsimapput. Akusiunerit Kalaallit Nunaanni aatsitassat pillugit ilisimasanut nutaamik ilanngussisuupput.

Ujarassiorimmi akissarsiassanik juulli sioqqutilaarlugu agguaassineqartarpoq. Missugassalli nunani allani assartorneqarnerata sivisusimanera COVID-19-illu akimmisaartitsineri pieqqutaallutik aatsaat qanittukkut misissuinerit inerneri nalilersorneqarsinnaasimapput.

Ujarassiorit nuna tamakkerlugu ujarassiuujunngitsunut aatsitassanik ujaasititsineruvoq, 1989-imili aasat tamaasa ingerluanneqartarsimasoq.