UKA2023-mut neriorsuutaagaluarpoq: Aalisarnermut inatsisissaq - aammaarluni kinguarteqqinneqarpoq
Naalakkersuisut ilisimatitsipput piffissalersuineq eqqarsaatigalugu maanna anguniarneqalersoq Inatsisartut upernaakkut 2024-mi ataatsimiinneranni suliarineqassasoq, 1. januar 2025-milu atuutilersinneqassasoq.
Pasitsannarpoq Naalakkersuisut Inatsisartuni "amerlanerussuteqarluartut" aalisarnermut inatsisissamut katersuutsissinnaasimanngikkaat, maannami piariaqartinneqalersimavoq inatsisissap Inatsisartunit suliarineqarnissaa kinguarteqqinneqassasoq:
- Nunatta aalisarneq inuussutissarsiutaasa pingaarnersaraat, taamaattumik Naalakkersuisut tamanna amerlasuunit tunngavissiorneqarsimalluni tapersersorneqarlunilu qulakkeerneqarsimanissaa pingaartilluinnarpaat, aalisarnermut inatsisissaq pitsaalluinnartumik tunuliaquteqarnissaa pingaartilluinnarlugu, nunatsinni aalisarnerup siunissamut aammali kinguaariinnut tulliuttunut qulakkeerneqarsimanissaa pingaaruteqarluinnarmat, Aalisarnermut Piniarnermullu Naalakkersuisoq, Karl Tobiassen (S) kinguartitsinermut tusagassiuutitigut nalunaarummini tunngavilersuivoq.
Oqaloqatigiinneq pitsaanerarpaa
Naalakkersuisut piffissarujussuarmik atuinikuupput soqutigisaqartut kattuffiinik aammalu Inatsisartuni partiinik paaseqatigiinnissaq siunertaralugu oqaloqateqarlutik. Naak massa kinguartitseqqittoqartariaqarsimagaluartoq, karl Tobiassen erseqqissaavoq oqaloqatigiinnerit pitsaasumik ingerlanneqartut:
- Inerititalimmik pitsaasumik oqaloqatigiittarnerit naatsorsuutiginngisamik sivisunerusimapput. Partiinik suli oqaloqatiginnittoqarpoq, naatsorsuutigineqarporlu oqaloqatigiittarnerit qanittukkut naammassineqarumaartut. Partiinik oqaloqatigiittarnerup siunertaraa Aalisarnermut Piniarnermullu Naalakkersuisup aalisarneq pillugu inatsisissamut periusissanik isumaqatigiissuteqarnissaa, partiit kissaataat isumaqatigiissutip ilaattut tunngavigineqartassallutik.
Neriorsuigaluarpoq UKA2023-mut siunnersuut naammasseriissasoq
Aalisarnermut Piniarnermullu Naalakkersuisoq, Karl Tobiassen aalajangersimaavilluni neriorsuuteqarnikuuvoq nunatta siunissami aalisarnermut inatsisissaa, 2023-mi ukiakkut Inatsisartut ataatsimiinneranni suliarineqarlunilu naammassineqassasoq:
- Uggornarpoq Inatsisartut ukiakkut 2023-mi inatsisissatut siunnersuutip oqaluuserineqarnissaanut killiliussaq pilersaarutit naapertorlugit naammassineqarsinnaanngimmat. Taamaattorli inatsisissatut siunnersuut suliarineqarluarsimasoq aamma amerlasuunit tunngavilersorluarneqarsimalluni tapersersorneqarluartoq saqqummiunneqarsinnaalissaaq. Tamanna kingusinaarluni tunniussinerup pitsaaqutigalugu iluaqutigissavaa, Nunatta siunissaa matumani pineqarmat.