Ukiaanerani ataatsimiinnissaq inissippoq: Umiarsuarnut takornariartaatinut akitsuutit, immikkoortitsineq aamma inuit nalunaarsorsimaffiat

Ukiaanerani ataatsimiinnissamut oqaluuserisassat inissinneqarput, arlallit ilisimaneqartut, kisianni aamma siunnersuutit nutaat amerlapput.

Inatsisartunut ilaasortat 22. septembarimi ukiaanerani ataatsimiinneq aallartillugu ataatsimiissapput-

Aappaagumut aningaasanut inatsisissatut siunnersuut pillugu isumaqatiginninniarnerit ataatsimiinnermi oqaluuserisat annerit ilagissavaat.

Naalakkersuisut aningaasanut inatsisissatut siunnersuummik saqqummiussisarput, kisianni tamatuma saniatigut Naalakkersuisut aamma inatsisissatut siunnersuutinik allanik inatsisinullu allannguutissanik arlalinnik saqqummiussaqarput.

Assigiinngisitsinnginnissaq pillugu inatsit

Naalakkersuisunit siunnersuutit annerit ilagaat naligiissitaaneq assigiinngisitsinnginnissarlu pillugit inatsit. Inatsimmik assigiinngitsorpassuartigut tunngaveqarluni toqqaannartumik toqqaannanngitsumillu, soorlu suiaassuseq, naartuneq, meeravissiartaarneq, erninermi sulinngiffeqarneq, kinguaassiutitigut sammiviup, suiaassutsini kinaassuseqarnerup, suiaassutsimik takutitsinerup, suiaassutsit ilisarnaataasa, kingoqqiffik, ammip qalipaataanik pissuteqarluni assigiinngisitsinnginnissaq siunertaavoq.

Naalakkersuisut aammattaaq Parisimi isumaqatigiissummut ilanngunnissamut tapersersorneqarnissaq anguniarniarpaa, Naalakkersuisut taanna ilannguffiginiarlugu ukiut marluk matuma siorna nalunaarutigaat.

Naalakkersuisoqataasut Siumut isumaqatigiissummut ilanngunnissamut nangaassuteqarnikuupput, upernaakkullu ataatsimiinnermi inaarutaasumik suliarinninnissap kinguartinneqarnissaa, aamma Avatangiisinullu Ataatsimiititaliap isumaqatigiissummut ilanngunnermi kingunerisinnaasaanik misissuilluarnissamut piffissaqartinneqarnissaa aalajangerneqarpoq.

Inuit nalunaarsorsimaffiat aappassaaneerneqassaaq

Naalakkersuisut aamma nalunaaruteqartartut illersorneqarnerisa pitsaanerulernissaannut siunnersuuteqarput, kiisalu umiarsuarnut takornariartaatinut akileraarutit atulerseqqinneqarnissaat.

Inatsisartunut ilaasortanit siunnersuutit akornanni Pele Brobergip, Naleraq, nunatsinni inuit nalunaarsorsimaffiannik pilersitsisoqartoqarnissaanik siunnersuutaa oqaluuserineqartorujussuuvoq. Siunnersuut siullermik 2022-mi suliarineqarpoq, Inatsisillu pillugit Ataatsimiititaliami suliarineqarpoq.

Nalunaarsuisarfik kikkut kalaaliunerannik ersersitsinissamik siunertarineqarpoq, Pele Brobergillu oqarnera naapertorlugu, tamanna kikkut Inatsisartunut qinersisinnaanerannik aalajangiinermut atorneqarsinnaassaaq, kiisalu siunissami Kalaallit Nunaata naalagaaffinngornissaanut taasititsisoqarsinnaaneranut atorneqarsinnaalluni.

Arpattarfiit aamma soraarnerussutisiat akileraaruteqanngitsut

Ilaasortanit siunnersuutit allat ilagaat arpattarfiit aamma atletik atorlugu sungiusartarfiit allat nuna tamakkerlugu sananeqarsinnanerannik periarfissap misissorneqarnissaa, Nivi Olsenip (D) siunnersuutigaa, aammattaaq Aqqalu C. Jerimiassen, Atassut, soraarnerussutisiat akileraarutaasarunnaarnissaannut periarfissamik nassuiaasoqarnissaa.

Ukiaanerani ataatsimiinneq tallimanngornermi 22. september nal. 11.00 Hans Egedep Illuanit Annaassisitta Oqaluffiani nal. 10 naalagiariarluni ingerlaaqatigiinnerup kingorna aallartissaaq.

Powered by Labrador CMS