Ukioq manna nipitittakkat siulliit saqqummiunneqarput

Tele-Postimi Filatelia nipitittakkanik ukioq manna siullerpaanik saqqummersitseqqammerpoq.

Nipitittakkat assigiinngitsut qulequttanut sisamanut tunngatinneqarput, tassalu:

• Kalaallit Nunaanni avatangiisit IV. Titartaasuuvoq eqqumiitsuliortoq Sissi Møller
• Issittup inoqajuitsui II, Kangerlussuaq. Titartaasuuvoq eqqumiitsuliortoq Naja Abelsen
• Kalaallit Nunaanni aningaasatoqaat IV. Suliarinnittuuvoq kigartuisartoq assilialiortartorlu Bertil Skov Jørgensen
• Kalaallit Nunaanni aalisakkat III. Titartaasuuvoq eqqumiitsuliortoq Martin Mörck

- Tele-Post-ip Tasiilami Filateliaa nipitittakkanik pisarnertut saqqummersitsisuuvoq. Nipitittakkat naqitarpassuit ilivitsukkaat tusindillit pisisartutsinnut nunarpassuarni assigiinngitsuniittunut sapaatip akunnerani uani nassiussorpagut. Suliaq suleqatikkalu pikkorissut peqatigiilluta naammassisinnaagatsigu nuanneqaaq, Tasiilami Filateliami nipitittakkanut pisortaq Allan Pertti Frandsen unnersiorpoq.

Nipitittakkat uani takukkit