Ukiormanna igasutsialak aamma igasunngorniartutsialak toqqarneqarsimalerput
Igaffimmi unamminerup kingorna ukiormanna igasutsialak igasunngorniartutsialallu tallimanngornermi unnukkut unammeqataasunut, aningaasaliisunut aamma qaaqqusanut inuussutissalerinermik ilinniarfimmi assuarluni nereqatigiittoqarnerani toqqaasoqarpoq
Igasunngorniat unammineranni Aqqalu Olsen Hotel Arcticimeersoq ajugaavoq, Miilu Nikolajsen Hotel Kangerlussuarmeersoq ajugaasumut tulliulluni. Ajugaasut pingajuat, siorna ajugaasut aappaat, Aggu Broberg Katuameersoq.
Igasunngorniarlutik ilinniartut savaaqqap neqaa aserortigaq pingaarnertut igavaa, kinguleqqiummullu iipilit.
Aqqalu Olsenip ukiup pingajussaanik ilinniartuulluni aamma Aasianneerluni oqaatigaa.
Ukiormanna igasutsialak Sune Bjerre Royal Greenlandimi Nuummeersuuvoq. Sune Bjerre aamma 2016-imi igasutsialanngornikuuvoq, siornalu ajugaasut pingajuattut inissinnikuulluni.
Ajugaasup aappaa tassaavoq, siorna ajugaasimasoq, Nick Fussing Rosbach, Hotel Hvide Falkimeersoq, ajugaasut pingajoraat Kunuk Grønlvold, Hotel Narsarsuarmeersoq, taanna siorna ajugaasut aappaattut inissippoq.
Igasut unamminerminni avaleraasartuut nunatsinneersut siuleqqiutissiaraat, tuttullu neqaa pingaarnertut nerisassiaralugu.
Igasoq dommerit ilaat, Kasper Trap Lindberg, Hotel og restaurationsskolenimi Valbymeersoq, ajugaasunik toqqaasoqarnerani igasut pitsaalluinnarmik qaffasissumik takutitsisut ilaatigut oqarpoq, nerisassiaallu Mchelinimik ulloriartalittut pitsaassuseqartutut oqaatigisinnaanerarpai.